Bagtyýar nesilleriň şatlygy
Ahal welaýat häkimliginiň garamagyndaky «Bagtyýar nesiller» çagalar sagaldyş we dynç alyş merkezi Gökdere jülgesiniň gözel we täsin künjeginde ýerleşýär. Bu ýerde möwsümiň ikinji tapgyrynda okuwçylaryň 300-si dynç alyp, wagtyny şadyýanlykda geçirýär.
Öňňin merkezde guralan «Şatlyk mekany Gökdere» atly döredijilik bäsleşigi bagtyýar nesillere ýatdan çykmajak pursatlary paýlady. Oňa ajaýyp jülgede ýerleşýän çagalar sagaldyş we dynç alyş merkezlerindäki zehinli çagalaryň uly topary gatnaşdy. Bäsleşikde çagalar aýdymdyr goşgy aýtmak, tans etmek, edebi-sazly kompozisiýany ýerine ýetirmek arkaly öz ukyp-başarnyklaryny görkezdiler. Olar öz çykyşlarynda eziz Watanymyzyň, gözel tebigatyň, bagtyýar çagalygyň waspyny ýetirip, Gahryman Arkadagymyza, Arkadagly Gahryman Serdarymyza buýsanç sözlerini beýan etdiler. Döredijilik işleriniň sergisi, «Jan Watanym Türkmenistan!» diýen tema boýunça asfaltyň ýüzüne surat çekmek bäsleşige aýratyn öwüşgin çaýdy. Çäräniň ahyrynda tapawutly çykyş edenlere ýadygärlik sowgatlar gowşuryldy.
— Merkezimizde çagalar uly alada bilen gurşalýar. Özara bäsleşiklerdir beýleki çäreler dynç alşyň her bir pursadyna aýratyn many-mazmun çaýýar. Sport ýaryşlary, aýdym-sazly we beýleki dabaralar dynç alýanlara ýatdan çykmajak ajaýyp pursatlary bagyş edýär. Şeýle çärelere ýaş nesliň höwesi örän uly. Çäreleriň ählisi ýokary guramaçylykly geçirilýär. Möwsümiň birinji tapgyrynda Magtymguly Pyragynyň döredijiligine bagyşlanan ýörite hepdelik, onuň çäklerinde ýaş aýratynlygyna laýyklykda çeper okaýyşlar, zehin we döredijilik bäsleşikleri hem geçirildi. «Sagdyn nesil — kuwwatly Watan», «Kim çalasyn?» ýaly sport ýaryşlarynda, «Gyz eli işde, döredýär ajap keşde» atly el işleriniň, «Kim bilmeşek?» atly zehin bäsleşiklerinde tapawutlananlara sowgatlaryň gowşurylmagy ruhubelentlik döretdi. Şular ýaly gyzykly bäsleşikleri ikinji tapgyrda-da geçirmek göz öňünde tutulýar — diýip, «Bagtyýar nesiller» çagalar sagaldyş we dynç alyş merkeziniň direktory Jemal Berdiýewa söhbetdeş bolanymyzda aýtdy.
Merkezde çagalaryň her bir gününiň manyly geçmeginde kompýuter, hünär we döredijilik, oýun oýnalýan, aýdym-saz otaglarynyň ähmiýeti diýseň uly. Döredilen döwrebap şertler okuwçylaryň gözýetiminiň giňelmeginde we täze okuw ýylyna täze güýç bilen barmagynda hem ähmiýetlidir.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň
halkara žurnalistikasy fakultetiniň talyby.
Surata düşüren Ilaman ÇÜRIÝEW.