6-njy iýun – Bütindünýä rus diliniň güni
Beýik rus şahyry A.S.Puşkiniň doglan güni bolan 6-njy iýunda köp dilliligi we medeni köpdürlüligi goldamak hem-de ösdürmek maksatnamasynyň çäklerinde BMG-de Rus diliniň güni bellenilýär. ÝUNESKO-nyň başlangyjy bilen her ýylyň 21-nji fewralynda bellenilýän Halkara ene diliniň öň ýanynda Ählumumy kommunikasiýalar departamenti Diller günlerini geçirmek barada karar kabul etdi. BMG-niň resmi dilleriniň halkara günleriniň geçirilmeginiň maksady Guramanyň işgärleriniň arasynda BMG-niň resmi dilleriniň altysynyň her biriniň taryhy, medeniýeti we ösüşi barada habarlylygy ýokarlandyrmakdyr.
Bu baýramçylyk medeni çäreler, aýdym-sazlary, edebi eserleriň ýerine ýetirilmegini, bäsleşikleri, sergileri, medeniýet işgärleriniň, folklor toparlarynyň çykyşlaryny, kinofilmleriň görkezilişini we BMG-niň resmi dilleriniň birini öwrenmek isleýänler üçin guralýan okuw sapaklary öz içine alýar.
Rus dili – slawýan dilleriniň arasynda has giň ýaýran, geografiki nukdaýnazardan we gürleýjileriň umumy sany boýunça dünýä dilleriniň ilkinji onlugynyň sanawyna girýär. Internetde ulanylýan dilleriň arasynda iň ýörgünlisi hem rus dilidir.
Her ýyl bu halkara güni mynasybetli dünýäniň birnäçe döwletlerinde rus halk aýdym-sazlarynyň konsertleri, sungat eserleriniň sergileri, leksiýalar, film görkezişler hem-de ekspress sapaklary dabaraly ýagdaýda geçirilýär.
Beýik rus şahyry A.S.Puşkiniň edebi döredijiligi gymmatlydyr. Onuň eserleri dünýä dilleriniň birnäçesine terjime edildi. Biziň ýurdumyzda daşary ýurt dillerini, şol sanda milletara gepleşik dili bolan rus dilini öwrenmäge uly üns berilýär. Türkmenistanda A.S.Puşkin adyndaky türkmen-rus umumy bilim berýän mekdep, döwlet rus drama teatry hem bar. Paýtagtymyzda Puşkiniň adyny göterýän köçede şahyryň ýadygärligi oturdyldy. Rus dilini öwrenmeklige biziň ýurdumyzda uly üns berilýär. Rus dili orta mekdepleriň ählisinde hökmany okadylýan dilleriň biridir. Türkmenistan 2023-nji ýyly GDA-da – Milletara gepleşik dili hökmünde «Rus diliniň ýyly» diýip yglan etmek baradaky çözgüdi goldady. Ýeri gelende aýtsak, ýurdumyzyň merkezi gazetleriniň biri bolan «Нейтральный Туркменистан» gazeti rus dilinde neşir edilýär. Ýerli teleradioýaýlymlarda rus dillinde gepleşikler berilýär.
Meýlis SADYKOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
2-nji ýyl talyby.