3-nji dekabr ─Halkara maýyplar güni
Berkarar döwletiň täze eýýamynyň Galkynyşy döwründe hormatly Prezidentimiziň ilatyň durmuş taýdan goraglylygyny üpjün etmek maksady bilen alyp barýan syýasatynyň çäklerinde, maýyplaryň durmuş goraglylygyny üpjün etmek döwletimiziň esasy wezipeleriniň biri hökmünde öňe sürülýär. Döwletimizde maýyplaryň beýleki raýatlar bilen deň derejede okamagy, bilim almagy, özleriniň söýen hünärlerine eýe bolmagy, halal zähmet çekmegi, maşgala gurmagy we sagdyn, bagtly durmuş sürmegi üçin ähli amatly şertler döredilendir.
Halkara Maýyplar güni 1992-nji ýylda BMG-niň Baş Assambleýasy tarapyndan yglan edilip, her ýylyň 3-nji dekabrynda bütin dünýäde bellenilýär. Bu günüň bellenilmegi olaryň durmuşda gabat gelýän kynçylyklaryna has oňat düşünip, olaryň hak-hukuklaryny durmuşa geçirmegiň ýollaryny tapmaga ýardam edýär.
Esasy Kanunymyzda: “Türkmenistanda jemgyýetiň we döwletiň iň ýokary gymmatlygy adamdyr” diýlip bellenilýär. Biziň ýurdumyzda mümkinçilikleri çäkli adamlaryň özlerini kemala getirmekleri üçin ähli derwaýys şertler döredilip, çagalaryň bilim almaklary üçin mekdepler hereket edýär, mümkinçilikleri çäkli adamlar üçin iş ýerleri döredilýär, maýyplygy bolan ulularyň hem-de çagalaryň ähli hukuklarynyň hem-de azatlyklarynyň mäkämligini üpjün edýän kanunçykaryjy hukuknamalaryň ençemesi hereket edýär. Ilatyň durmuş taýdan goraglylygyny üpjün etmek döwletiň ilkinji wezipeleriniň hatarynda durýar.
Halkara maýyplar gününiň geçirilmeginiň esasy maksady olaryň durmuş abadanlygyny üpjün etmäge, olaryň hak-hukuklaryny we mertebesini goldamaga gönükdirilendir. Birleşen Milletler Guramasy (BMG) hemme adamlaryň, şol sanda maýyplaryň hem hukuklaryny goramaga gönükdirilen çäreleri geçirýär. BMG jemgyýetiň syýasy, ykdysady, sosial we medeni durmuşynda maýyplaryň hem beýleki adamlar bilen deň derejede gatnaşyp bilmekleri üçin ýörite çäreleri geçirýär.
Ýunus TAGANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.