24-nji Ýanwar - Halkara bilimler güni
Bilim – üstünligiň gözbaşy. Döredijiligiň ylham çeşmesi. Edil giň dünýä ýaly, bilimiň-ylmyň çygry hem örän giňdir. Onuň belli bir basgançagyna ýetip, özüňi beýik adam hasaplamak bolmaz. Bilim tükeniksiz umman mysalydyr.
2018-nji ýylyň 3-nji dekabrynda Birleşen Milletler Guramasynyň Baş Assambleýasynyň kararyna laýyklykda 24-nji ýanwary “ Halkara bilimler güni ” diýlip yglan edildi. Bu bolsa dünýä ýüzünde häzirki wagtda bilim ulgamynyň esasy orunda durýandygyň subutnamasy bolup durýar. Dünýä jemgyýetinde ylmyň we tehnologiýalaryň ösmegi, innowasiýalaryň ilerlemegi, sanly ykdysadyýetiniň we bilimler jemgyýetiniň kemala gelmegi, bilim ulgamynyň täze nusgasynyň durmuşa ornaşdyrylmagy öňe tutulýan ugurlaryň biridir.
Häzirki wagtda muňa garamazdan, UNESKO-nyň bellemegine görä dünýäde 262 mln. çaga mekdebe gitmeýär, 617 mln. çaga we ýetginjek okap, ýazyp bilmeýär, 4 mln. bosgunçy okuw hukuklaryndan mahrum edilendir. Bu çagalaryň we ýetginjekleriň okamak haklary ellerinden alnan we bu ýagdaýyň kabul edilmezligini hem-de, ähli ýurtlaryň, guramalaryň ýokary hilli bilim bermek üçin ynsanperwerlik kömegini etmeklerini isleýärler.
Şunuň ýaly ýagdaýlary göz öňünde tutup, häzirki wagtda ähli ýurtlarda, sebitlerde bilimiň, ylmyň deň derejede ösmegine gözegçiligi ýokarlandyrmak göz öňüne tutulýan esasy meseleleriň biridir. Dünýä ýüzünde bilimiň gazananlaryny durmuşa ornaşdyrmak, kämil tehnologiýalar bilen üpjün etmek, ýaşlaryň ylmyň dürli ugurlaryndan baş çykarmaklary ugrunda alnyp barylýan özgertmeler muňa aýdyň mysaldyr.
Eziz Diýarymyzda hem bilim ulgamynda uly ösüşler gazanylýar. Hormatly Prezidentimiziň ýolbaşçylygynda ýaş nesilleriň ýokary hilli bilim almaklary üçin giň mümkinçilikler döredilýär. Ösen tehnologiýalar bilen ornaşdyrylan ýokary okuw mekdepleri, orta we orta hünär okuw mekdepleri ýaşlaryň okamaga, döretmäge bolan isleglerini has-da artdyrýar.
Şunuň ýaly mümkinçilikleri döredip berýän Gahryman Arkadagymyza köp sag bolsun aýdýarys. Goý, hormatly Prezidentimiziň jany sag, ömri uzak bolsun!
Gyzlargül ANNAGURDOWA
Türkmenistanyň Daşary işler ministliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby