«Magtymguly, dile dessan getirdim» atly döredijilik bäsleşigi geçirildi
2024-nji ýylyň 15-nji fewralynda Gündogaryň beýik akyldary, nusgawy şahyrymyz Magtymguly Pyragynyň doglan gününiň 300 ýyllygy mynasybetli Türkmenistanyň Daşary işler ministrliginiň Halkara gatnaşyklary instituty tarapyndan yglan edilen «Magtymguly, dile dessan getirdim» atly döredijilik bäsleşiginiň ýeňijilerini sylaglamak dabarasy geçirildi. Bu bäsleşige ýurdumyzyň döredijilik we ylym bilen meşgullanýan raýatlary, ýokary okuw jaýlarynda bilim alýan zehinli ýaşlar Magtymguly Pyragynyň döredijiligine bagyşlap döreden hekaýalary, makalalary we goşgulary bilen gatnaşdylar.
Hormatly Prezidentimiziň parasatly baştutanlygynda ösüşlere beslenýän Diýarymyzda bagtyýar türkmen halky dana, beýik söz ussady Magtymguly atamyzyň arzuwlan zamanasynda – berkarar döwletde ýaşamak bilen, nusgawy şahyryň döredijiligine, edebi mirasyna uly sarpa goýýar. Munuň şeýledigini ýurdumyzda geçirilýän döredijilik bäsleşikleriniň mysalynda hem görmek bolýar.
Arkadag Serdarly bagtyýar ýaşlar ýylynda yglan edilen we «Pähim-paýhas ummany Magtymguly Pyragy» ýylynda jemi jemlenen bu bäsleşigiň emin topary döredilen eserleriň döwrebaplygyna, çeper beýan ediliş we žanr aýratynlygyna üns berdiler. Bäsleşige hödürlenýän eserler «Iň gowy hekaýa», «Iň gowy makala», «Iň gowy goşgy» ady bilen bahalandyryldy.
«Magtymguly, dile dessan getirdim» atly döredijilik bäsleşiginde birnäçe döredijilik zehinleri baýrakly orunlara mynasyp boldular. Olardan «Iň gowy makala» ugry boýunça 1-nji orna Magtymguly adyndaky Türkmen döwlet uniwersitetiniň talyby Muhammetnur Mahtumow, 2-nji orna Türkmen döwlet medeniýet institutynyň mugallymy Bahar Ataýewa, 3-nji orna Türkmen döwlet bedenterbiýe we sport institutynyň mugallymy Jennet Geldibaýewa, «Iň gowy goşgy» ugry boýunça 1-nji orna Türkmenistanyň Goranmak ministrliginiň Merkezi serkerdeler öýüniň çagyryş boýunça harby gullukçysy Maksatmyrat Çaryýew, 2-nji orna Magtymguly adyndaky Türkmen döwlet uniwersitetiniň talyby Didar Erkäýew, 3-nji orna Türkmenistanyň Telekommunikasiýalar we informatika institutynyň talyby Bahargül Halytgulyýewa, «Iň gowy hekaýa» ugry boýunça 1-nji orna Türkmenistanyň Daşary işler ministrliginiň Halkara gatnaşyklary institutynyň talyby Atamyrat Ýazweliýew, 2-nji orna Türkmenistanyň Oguz han adyndaky Inžener-tehnologiýalar uniwersitetiniň talyby Ylýas Amangeldiýew, 3-nji orna Magtymguly adyndaky Türkmen döwlet uniwersitetiniň talyby Söýli Hydyrowa, şeýle hem höweslendiriji baýraga Türkmenistanyň Telekommunikasiýalar we informatika institutynyň talyby Jeýhun Jumaşow, Döwletmämmet Azady adyndaky Türkmen milli dünýä dilleri institutynyň talyby Şirin Orazmyradowa, Magtymguly adyndaky Türkmen döwlet uniwersitetiniň talyby Sülgün Seýidowa mynasyp boldular.
Laçyn MÄTJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.