Ýokary okuw mekdepleriň mugallymlary suw diplomatiýasy boýunça okuwa gatnaşdylar
2024-nji ýylyň 7-nji iýunynda ABŞ-nyň Halkara Ösüş guramasynyň (USAID) guramagynda paýtagtymyzyň «Arçabil» myhmanhanasynda suw diplomatiýasy, halkara suw hukugy we suw çeşmelerinden tygşytly peýdalanmak boýunça okuw geçirildi. Oňa ýurdumyzyň ýokary okuw mekdepleriniň mugallymlary bilen bilelikde Türkmenistanyň Daşary işler ministrliginiň Halkara gatnaşyklary institutynyň mugallymlary hem gatnaşdylar.
Okuwyň dowamynda Türkmenistanyň Suw hojalygy boýunça döwlet komitetiniň wekilleri we hünärmenler suw dolandyrmagyň milli we sebitleýin wezipeleri, umumy suwlary bilelikde ulanmak we goramak baradaky halkara şertnamalary, şeýle hem suw çeşmelerini tygşytly peýdalanmak boýunça halkara tejribesi barada gürrüň berdiler. Şeýle hem, degişli hünärmenler Türkmenistanyň ýokary okuw mekdepleriniň meýilnamasyna girizmek üçin niýetlenen suw çeşmelerinden tygşytly peýdalanmak, gidrotehniki desgalaryň howpsuzlygyna we serhedaşa suw hyzmatdaşlygyna degişli işlenip düzülen okuw kursunyň ähmiýetini bellediler.
Gapbar HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň mugallymy,
Durnukly ösüş maksatlary boýunça
ylmy-usulyýet
merkeziniň utgaşdyryjysy.