Ykdysady diplomatiýa ugry boýunça okuw sapagy dowam edýär
2023-nji ýylyň 12-nji aprelinde Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň “Ykdysady diplomatiýa” ugry boýunça Türkmen döwlet ykdysadyýet we dolandyryş institutynyň talyplarynyň gatnaşmagynda “Pudaklaryň işewür taraplaryny daşary ýurt bazarlaryna çykarmakda marketingiň we banklaryň orny” atly tema boýunça okuw sapagy geçirildi.
Okuw sapagyny Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary kafedrasynyň dosenti, tehniki ylymlarynyň kandidaty Öwezmyrat Bäşimow alyp bardy.
Okuw sapagynda hususyýetçileriň kemala gelýändigi hem-de döwletimiziň olar bilen özara gatnaşyklary, ýurdumyzyň bazar ulgamyny kämilleşdirmekde örän uly ähmiýete eýe bolup durýandygy hakynda bellenilip geçildi. Şeýle-de Türkmenistanda telekeçileriň öz önümleri bilen daşary ýurt bazarlaryna çykmagynda halkara marketingiň we bank ulgamynyň eýeleýän orny barada maglumatlar diňleýjilere ýetirildi.
Sapagyň dowamynda Halkara ykdysady gatnaşyklary fakultetiniň I ýyl talyby Güljeren Ataýewa özüniň “Telekeçileri daşary ýurt bazarlaryna çykarmakda halkara marketingiň orny” atly ylmy işiniň I tapgyry boýunça jemlän maglumatlary bilen gatnaşyjylary tanyş etdi.
Okuw sapagynda talyplar özlerini gyzyklandyrýan sowallara anyk mysallaryň üsti bilen jogap aldylar.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy.