ÝEWROPA HOŞNIÝETLI GOŇŞUÇYLYK GEŇEŞINIŇ DOLANDYRYJY DIREKTORY BILEN GEÇIRILEN DUŞUŞYK
2025-nji ýylyň 15-nji dekabrynda Türkmenistanyň Daşary işler ministrliginiň Halkara gatnaşyklary institutynda Ýewropa hoşniýetli goňşuçylyk geňeşiniň dolandyryjy direktory (ENC) Samuel Doweri Westerbýunyň hem-de institutyň rektory Gülşat Ýusupowanyň arasynda duşuşyk geçirildi. Oňa Türkmenistanyň Belgiýa Patyşalygyndaky Adatdan daşary we Doly ygtyýarly ilçisi Sapar Palwanow hem gatnaşdy.
Duşuşygyň esasy maksady Ýewropadaky Merkezi Aziýa boýunça öňdebaryjy merkez bolan Ýewropa hoşniýetli goňşuçylyk geňeşiniň (ENC), Türkmenistanyň energetika, ulag we howpsuzlyk meseleleri boýunça halkara syýasatynyň gidişini we Ýewropa Bileleşigi üçin mümkin bolan hyzmatdaşlyk mümkinçiliklerini hem-de Türkmenistanyň Daşary işler ministrliginiň Halkara gatnaşyklary instituty bilen ENC-niň arasynda, ylmy-barlag we analitiki alyş-çalyş arkaly hyzmatdaşlygy ýola goýmakdan ybarat boldy. Onda taraplar esasan energetika, ylym-bilim babatyndaky hyzmatdaşlyk hem-de sebitde howpsuzlyk we parahatçylyk ýaly möhüm ugurlary ara alyp maslahatlaşdylar. Energetika ugry boýunça, türkmen gazyny Ýewropa bazarlaryna eltmegiň mümkinçilikleri we Transhazar gazgeçirijisiniň geljegi bilen baglanyşyklylykda Türkmenistanyň “ýaşyl” energiýa potensialyny öwrenmek ýaly meseleler gozgaldy.
Ylym we bilim hyzmatdaşlygynda bolsa, hünärmenleriň ÝB-däki syýasy-seljeriş işlerine gatnaşmak, gysga möhletli okuw-tejribelik maksatnamalaryny guramak ýaly ugurlar boýunça bilelikdäki mümkinçilikler maslahatlaşyldy.
Samuel Doweri Westerbýu ENC-niň goňşy sebitler we Merkezi Aziýa boýunça alyp barýan barlag taslamalaryna, şol sanda Akademiki Geňeşiň agzalarynyň işine gözegçilik edýär. Onuň barlag işleri esasan ÝB bilen Ýakyn Gündogar we Demirgazyk Afrika (MENA) hem-de ÝB bilen Türkiýe Respublikasynyň arasyndaky gatnaşyklara, şol sanda söwda, energetika, migrasiýa we hoşniýetli goňşuçylyk syýasatyna gönükdirilendir. Ol köp sanly barlag işleriniň, şol sanda “Palgrave Macmillan” neşirinde çap edilen “ÝB-niň Gündogar gapdalyndaky howpsuzlyk güýçlerini dolandyrmak” atly kitabyň hem awtorydyr.
ÝB bilen köp ýyllaryň dowamyndaky hyzmatdaşlygyň hereket edýän taslamalaryň, maksatnamalaryň, hususan-da, «Ýewropa Bileleşigi — Türkmenistan» bilelikdäki komitetiniň, parlamentara dialogynyň, adam hukuklary boýunça dialogynyň, daşary syýasat edaralarynyň arasyndaky geňeşmeleriň çäklerinde yzygiderli ilerledilýändigi nygtaldy. Duşuşygyň dowamynda gazanylan üstünlikler we geljekki hyzmatdaşlygyň mümkinçilikleri barada pikir alşyldy.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.