Ýewropa Bileleşiginiň “Erasmus+” maksatnamasy bilen tanyşlyk
2024-nji ýylyň 20-nji ýanwarynda Türkmenistanyň Daşary işler ministrliginiň Halkara gatnaşyklary institutynda Ýewropa Bileleşiginiň “Erasmus+” maksatnamasynyň taslamalary bilen tanyşdyrylyş çäresi geçirildi. Oňa “Erasmus+” maksatnamasynyň Türkmenistandaky utgaşdyryjysy Aýna Çörekliýewa, taslama ýolbaşçysy Güljan Saryýewa we ýokary okuw mekdepleriniň mugallymlary we talyp ýaşlary gatnaşdylar.
Çäräniň dowamynda A.Çörekliýewa “Erasmus+” maksatnamanyň çäklerinde Türkmenistanda alnyp barylýan işler barada gürrüň berdi, şeýle hem Halkara kredit hereketliliginiň (ICM) işi bilen tanyşdyrdy. G.Saryýewa “Erasmus Mundus bilelikdäki magistrlik derejesi” (EMJMD) taslamasy barada gürrüň berdi. Mundan başga-da, G.Saryýewa Ýewropa Bileleşiginiň öňdebaryjy tejribesini öwrenmäge niýetlenen “Jean Monnet” maksatnamasy barada aýtdy.
Şeýle-de, çäräniň dowamynda “Ylymlaryň doktory” alymlyk derejesini almak boýunça dalaşgärler üçin “Erasmus+” maksatnamasynyň “Mariýa Sklodowskaýa-Kýuri” atly taslamasy tanyşdyryldy.
Çäräniň ahyrynda oňa gatnaşyjylar özlerini gyzyklandyrýan soraglary berip, anyk we giňişleýin jogaplary aldylar.
Ýewropa Bileleşiginiň “Erasmus+” maksatnamasy ýaşlara birnäçe ýurtlarda bilim almak mümkinçiligini döredip, talyp ýaşlaryň we hünärmenleriň ylym-bilim ulgamynda tejribesiniň baýlaşmagyna ýardam edýär.
Rahym AKMURADOW,
Türkmenistanyň Daşary işler ministrliginiň
Halkara gatnaşyklary institutynyň mugallymy