Ýaponiýanyň milli tagamy "Suşi" bilen tanyşlyk
Ýaponiýanyň Türkmenistandaky ilçihanasy tarapyndan 2022-nji ýylyň 8-nji iýulynda Türkmenistanyň Şekillendiriş sungaty muzeýinde «Men suşini gowy görýärin» atly serginiň açylyş dabarasy boldy. Sergi 8-29-njy iýuly aralygynda dowam eder.
Sergi ýapon halkynyň özboluşly dünýäsi, olaryň milli tagamlarynyň taryhy gelip çykyşy, taýýarlanylyşy we aýratynlyklary barada ýakyndan tanyşmak isleýänleri bir ýere jemledi. Ýapon halkynyň milli däbi bolan Suşi tagamynyň taýýarlanylyşy, olaryň görnüşleri sergide giň köpçülige hödürlenildi.
Serginiň açylyş dabarasynda ýapon dili, medeniýeti we sungaty boýunça bilim berilýän Türkmenistanyň ýokary okuw jaýlarynyň talyplary, köpçülikleýin habar beriş serişdeleriniň wekilleri, ýapon medeniýetiniň köp sanly janköýerleri hem-de paýtagtymyzyň myhmanlary gatnaşdylar.
Soňky ýyllarda türkmen-ýapon gatnaşyklary giň gerime eýe bolýar. Türkmen-ýapon medeni gatnaşyklarynyň çäklerinde yzygiderli sergiler guralýar. Hususan-da, 2021-nji ýylyň fewral aýynda «Ýapon gurjaklarynyň sergisi», 2022-nji ýylyň mart aýynda «Ýakasime: Ýeriň özgerişi» atly ýapon keramikasynyň sergisi guraldy.
Türkmen-ýapon gatnaşyklary günsaýyn ösýär, özgerýär we ýokary derejelere eýe bolýar. Şol gatnaşyklaryň möhüm ugurlary ylym we bilim ulgamynda hem okgunly ösdürilýär. Bu ulgamlaryň kämilleşmegi bolsa, iki dostlukly ýurduň ösüşiniň esasy maksatlaryny nazarlaýar.
Meňli HOJAMUHAMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň II ýyl talyby.