Wodorod energiýasyny ösdürmekde halkara derejesindäki duşuşyk geçirildi
2022-nji ýylyň 8-nji aprelinde Türkmenistanyň Daşary işler ministrliginiň Halkara gatnaşyklary institutynda Ýaponiýanyň «Kawasaki Heavy Ind.» kompaniýasynyň wodorod energiýasynyň önümçiligi bilen bagly tejribesini öwrenmek hem-de bu ugurda hyzmatdaşlyk etmegiň mümkinçiliklerini ara alyp maslahatlaşmak üçin wideo aragatnaşyk arkaly duşuşyk geçirildi.
Duşuşyga Türkmenistanyň Energetika ministrliginiň, «Türkmenhimiýa», «Türkmengaz» we «Türkmennebit» döwlet konsernleriniň, Türkmenbaşynyň nebiti gaýtadan işleýän zawodlar toplumynyň, Türkmenistanyň Ylymlar akademiýasynyň wekilleri, Ýagşygeldi Kakaýew adyndaky Halkara nebit we gaz uniwersitetiniň, TDIM-niň Halkara gatnaşyklary institutynyň mugallymlary we talyp ýaşlary gatnaşdylar.
Duşuşygyň barşynda wodorody öndürmegiň tehnologik aýratynlyklary, tebigy gazdan wodorody almagyň usullary, «Kawasaki Heavy Ind.» kompaniýasynyň Türkmenistanda amala aşyrýan iri energetik taslamalary ara alnyp maslahatlaşyldy.
Ýurdumyzyň daşary syýasatynyň ileri tutulýan ugurlarynyň biri energetika diplomatiýasydyr. Bu ugurda halkara hyzmatdaşlygy ösdürmekde yzygiderli işler alnyp barylýar. Şunuň bilen baglylykda, hormatly Prezidentimiziň energetika ulgamynda öňe sürýän halkara başlangyçlaryndan ugur alnyp, Türkmenistanyň wodorod energiýasy babatda halkara hyzmatdaşlygyny ösdürmek boýunça 2022-2023-nji ýyllar üçin «Ýol kartasynyň» taslamasy işlenip düzüldi.
Maral KARLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary
fakultetiniň I ýyl talyby.