WAGYZ-NESIHAT ÇÄRESI GEÇIRILDI
2024-nji ýylyň 13-nji dekabrynda Türkmenistanyň Daşary işler ministrliginiň Halkara gatnaşyklary institutynda mugallymlaryň we talyplaryň gatnaşmagynda ýaşlaryň arasynda terbiýeçilik işlerini güýçlendirmek, olaryň ýüze çykýan nogsanlyklardan daşda durmaklaryny gazanmak, hukuk sowatlylygyny artdyrmak hem-de Täze ýyl baýramçylygyny ýokary guramaçylykly geçirmek, şol sanda partlaýjy maddalaryň adamyň saglygyna ýetirýän zyýany baradaky ýaşlaryň sowatlylygyny ýokarlandyrmak, milli däp-dessurlarymyzy giňden wagyz etmek maksady bilen wagyz-nesihat çäresi geçirildi. Onda Türkmenistanyň Mejlisiniň, Türkmenistanyň Içeri işler ministrliginiň, Türkmenistanyň Baş prokuraturasynyň, Türkmenistanyň Bilim ministrliginiň, Türkmenistanyň Zenanlar birleşiginiň Merkezi Geňeşiniň, Türkmenistanyň Magtymguly adyndaky Ýaşlar guramasynyň wekilleri çykyş etdiler.
Wagyz-nesihat çäresiniň dowamynda Täze ýyl baýramy mynasybetli partlaýjy maddalary (jisimleri) taýýarlamak, ulanmak we ulanylýan ýerlerine barmagyň Türkmenistanyň kanunçylygynda bellenen jogapkärçilige çekilýändigi barada aýratyn bellenildi. Täze ýyl baýramçylygynyň bellenilýän günlerinde talyplaryň köpçülik ýerlerinde özlerini tertipli alyp barmalydyklary, zyýanly endiklerden daşda durmalydyklary baradaky çykyşlar bolsa giň many-mazmuna eýe boldy. Şeýle çäreleriň yzygiderli geçirilmegi Türkmenistanyň kanunçylygynyň pugtalanmagy we talyp ýaşlaryň zyýanly endiklerden daşda durmaklygy üçin uly ähmiýete eýedir.
Çykyş edenler Berkarar döwletiň täze eýýamynyň Galkynyşy döwründe Garaşsyz, hemişelik Bitarap Türkmenistan döwletimizde her bir raýat hakynda taýsyz tagallalary hem-de ýadawsyz aladalary edýän türkmen halkynyň Milli Lideri, Gahryman Arkadagymyza, Arkadagly Gahryman Serdarymyza köp sagbolsunlaryny aýtdylar!
Mäneguly ÖWEZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.