30/11/2023
1328
SANLY ULGAM ARKALY GEÇIRILEN DUŞUŞYK
2023-nji ýylyň 30-njy noýabrynda Türkmenistanyň Daşary işler ministrliginiň Halkara gatnaşyklary institutynyň we Ukrainanyň Daşary işler ministrliginiň Gennadiý Udowenko adyndaky Diplomatik akademiýasynyň wekilleriniň arasynda onlaýn duşuşyk geçirildi.
Türkmen diplomatiýasynyň milli mekdebiniň adyndan Türkmenistanyň Daşary işler ministrliginiň Halkara gatnaşyklary institutynyň rektory Jumamyrat Gurbangeldiýew, Halkara gatnaşyklary we diplomatiýa kafedrasynyň uly mugallymy, Türkmenistanyň Adatdan daşary we Doly ygtyýarly Ilçisi Nurberdi Amanmyradow hem-de Gennadiý Udowenko adyndaky Diplomatik akademiýasynyň direktory, Ukrainanyň Adatdan daşary we Doly ygtyýarly Ilçisi Gennadiý Nadolenko we direktoryň orunbasary Oleksandr Kriçenko dagy gatnaşdylar. Ilkibaşda taraplar iki ýokary okuw mekdebiň ylym we terbiýeçilik işleriniň alnyp barlyşy hakynda içgin tanyşdylar. Duşuşygyň dowamynda wekiller okuw seminarlaryny bilelikde gurnamak, ylmy işleri alyp barmak, şol sanda makalalary, okuw kitaplary, gollanmalary neşir etmek, akademiki maksatnamalary alyş-çalyş etmek boýunça bilelikdäki guramaçylyk pudagynda mundan beýläkki hyzmatdaşlygyň geljegi barada pikir alyşdylar.
Ýeri gelende belläp geçsek, şu ýyl Türkmenistanyň Daşary işler ministrliginiň Halkara gatnaşyklary instituty bilen Ukrainanyň Diplomatik akademiýasynyň arasynda Özara hyzmatdaşlyk Ähtnamasyna gol çekilmegine 10 ýyl dolýandygy has hem guwandyryjy wakalaryň biridir. Duşuşygyň dowamynda taraplar iki ýokary okuw mekdebiň arasynda on ýyllyk netijeli gatnaşyklaryň alnyp barlandygy we mundan beýläk-de dowam etdiriljek hyzmatdaşlygyň aýdyň geljegini maslahatlaşdylar.
Ikitaraplaýyn duşuşygyň ahyrynda Türkmenistanyň Daşary işler ministrliginiň Halkara gatnaşyklary institutynyň wekilleri ukrain kärdeşlerini Gündogaryň beýik şahyry Magtymguly Pyragynyň 300 ýyllygyna bagyşlanan çärelere, dabaraly maslahatlara gatnaşmaga çagyrdylar.
Merdan BERDINYÝAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa kafedrasynyň
uly mugallymy.