TÜRKMENISTANYŇ YKDYSADYÝETINI ÖSDÜRMEKDE ULAG DIPLOMATIÝASYNYŇ ÄHMIÝETI” TEMA BOÝUNÇA OKUW SAPAGY GEÇIRILDI
2022-nji ýylyň 24-nji martynda Türkmenistanyň Inžener-tehniki we ulag kommunikasiýalar institutynda Türkmenistanyň Daşary işler ministrliginiň Halkara gatnaşyklary institutyndaky Türkmenistandanyň diplomatiýasynyň möhüm ugurlary boýunça okuw merkeziniň “Ulag diplomatiýasy” ugry boýunça fakultatiw okuw sapagy geçirildi. Okuw sapagyny Türkmenistanyň Daşary işler ministrliginiň Halkara gatnaşyklary institutynyň Jemgyýeti öwreniş ylymlary kafedrasynyň müdiriniň wezipesini ýerine ýetiriji, uly mugallym, filosofiýa ylymlarynyň kandidaty Ogulgurban Sapargeldiýewna Ezimowa geçirdi. Alym öz çykyşynda häzirki döwürde ykdysady diplomatiýanyň dürli ugurlarynyň kemala gelendigi we ylmy taýdan esaslandyrylandygy barada aýtdy.
Ulag diplomatiýasy ykdysady diplomatiýanyň wajyp düzüm bölegi bolup, ýurdumyzda üstünlikli ösdürilýär. 2022-nji ýylyň 19-njy martynda Garaşsyz, hemişelik Bitarap Türkmenistanyň Prezidenti hormatly Serdar Gurbangulyýewiç Berdimuhamedow iň ýokary döwlet wezipesine girişmek dabarasynda eden taryhy çykyşynda: “Häzirki döwürde ulag-logistika ulgamy sebitleri we dünýäniň kontinentlerini birleşdirýän güýje öwrülýär. Şunuň bilen baglylykda, ýurdumyz Beýik Ýüpek ýolunyň ýüregi bolup durýar. Şoňa görä-de, bu geografik ýagdaýdan we beýleki mümkinçiliklerden ýerlikli peýdalanarys” diýip belledi.
Ulag diplomatiýasynyň dünýä syýasatynda we halkara gatnaşyklarynda tutýan oruny artýar we kämilleşýär. Ulaglary ösdürmek we diwersifikasiýalaşdyrmak diplomatiýanyň netijeli gurallaryny peýdalanmak arkaly amala aşyrmak, geosyýasy amatlyklary we ösen ulaglar toplumynda halkara hyzmatdaşlygyny ösdürmek, şeýle-de olary döwletimiziň daşary syýasatynyň mundan beýläk hem täsirliligini gazanmakda peýdalanmak Türkmenistanyň içeri we daşary syýasatynyň baş maksatlarynyň biri bolup durýar.
Täsirli geçen okuw sapagyna Türkmenistanyň Inžener-tehniki we ulag kommunikasiýalar institutynyň professor-mugallymlary we talyp ýaşlary gatnaşdylar.
Bibijan JORAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Sanly diplomatiýa ugry boýunça magistranty