TÜRKMENISTANYŇ TÜRKIÝE RESPUBLIKASYNDAKY ADATDAN DAŞARY WE DOLY YGTYÝARLY ILÇISI BILEN OKUW SAPAGY GEÇIRILDI
2024-nji ýylyň 10-njy dekabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň “Öňüni alyş diplomatiýasy” ugry boýunça Türkmenistanyň Türkiýe Respublikasyndaky Adatdan daşary we Doly ygtyýarly Ilçisi Mekan Işangulyýewiň alyp barmagynda okuw sapagy geçirildi. Okuw sapagyna institutyň mugallymlary we talyp ýaşlary gatnaşdylar.
Ilçi okuw sapagynyň dowamynda Türkmenistanyň we Türkiýe Respublikasynyň arasyndaky ikitaraplaýyn gatnaşyklar we halkara guramalarynyň çäklerindäki hyzmatdaşlyk, Türkiýe Respublikasynyň diplomatiýasynyň, has takygy, diplomatik gullugynyň, protokolynyň, etiketiniň aýratynlyklary dogrusynda giňişleýin gürrüň berdi.
Okuw sapagy talyplar üçin örän täsirli bolup, olar özlerini gyzyklandyrýan sowallaryna jogap aldylar.
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.