Türkmenistanyň Konstitusiýasynyň we Türkmenistanyň Döwlet baýdagynyň güni mynasybetli geçirilen ylmy-amaly maslahat
2022-nji ýylyň 13-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Konstitusiýasynyň we Türkmenistanyň Döwlet baýdagynyň güni mynasybetli mugallymlaryň we talyplaryň gatnaşmagynda «Türkmenistanyň Konstitusiýasy we Döwlet baýdagy: Berkararlyk kuwwatynyň nurly nyşany» atly ylmy-amaly maslahaty geçirildi. Maslahata Türkmenistanyň Döwlet, hukuk we demokratiýa institutynyň wekilleri, Türkmenistanyň Daşary işler ministrliginiň Halkara gatnaşyklary institutynyň hem-de beýleki ýokary okuw mekdepleriniň mugallymlary we talyplary şeýle-de «Ýaş diplomatlar» mekdebiniň işjeň agzalary bolan mekdep okuwçylary gatnaşdylar.
Maslahatyň umumy mejlisinde «Türkmenistanyň Konstitusiýasynyň we Döwlet Baýdagynyň 30 ýyllygy – berkararlygyň we ösüşiň dabaralanmagy», «Çaganyň hukuklarynyň goraglylygynyň milli hukuk kepillikleri», «Kämil ahlak – ösen jemgyýet» hem-de «Demokratik, hukuk we dünýewi döwletiň ösüşleriniň binýady» atly temalar boýunça çykyşlar edildi.
Ylmy-amaly maslahatyň umumy mejlisinden soň öz işini bölümçelerde dowam etdirdi. «Garaşsyz Türkmenistanyň kanun çykaryjylyk ulgamynyň kämilleşdirilmegi», «Ýurdumyzyň ykdysady ösüşiniň konstitusion esaslary», «Türkmenistanyň Konstitusiýasy we Döwlet baýdagy – parahatçylygyň, berkararlygyň we ruhubelentligiň nyşany» atlary bilen geçirilen bölümçelerde bolsa Türkmenistanyň Konstitusiýasynyň kämilleşdirilişiniň, ynsanperwerlik ýörelgesiniň, Döwlet baýdagynyň mukaddesliginiň, milli kanunçylykda ýaşlaryň hukuk goraglylygynyň, ýurdumyzda eýeçilik gatnaşyklarynyň kämilleşmeginiň ähmiýeti we täsiri barada köp sanly çykyşlar diňlenildi.
“Halkyň Arkadagly zamanasy” ýylynda umumy ykrar edilen ýörelgeler bilen birlikde türkmen halkynyň gadymdan gelýän asylly däp-dessurlaryny özünde jemleýän Türkmenistanyň Konstitusiýasynyň esaslandyrylmagyna 30 ýyl dolýar. Türkmenistanyň Konstitusiýasy özygtyýarly döwletimiziň mizemez hukuk binýady bolmak bilen, halkymyzyň bitewülik, demokratiýa, ynsanperwerlik, watançylyk we adalatlylyk baradaky köpasyrlyk arzuwlaryny şöhlelendirýär.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk
öwreniş
kafedrasynyň uly mugallymy.