TÜRKMENISTANYŇ HALK MASLAHATY – MILLI DEMOKRATIÝANYŇ KÄMIL NUSGASY
2023-nji ýylyň 30-njy sentýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Halk Maslahatynyň döredilmeginiň we onuň işiniň taryhy ýerine ýetirýän wezipeleri barada maslahat geçirildi. Maslahata Žurnalistikanyň nazaryýeti we amalyýeti kafedrasynyň “Ýaş žurnalistler” ylmy-döredijilik gurnagynyň täze agzalary gatnaşdylar. Maslahatda Žurnalistikanyň nazaryýeti we amalyýeti kafedrasynyň uly mugallymy Jemile Pürjäýewa çykyş etdi. Ol öz çykyşynda türkmen halkynyň döwlet gurluşy babatda köp asyrlyk taryhynda toplan tejribesini hemmetaraplaýyn nazara alyp, ata-babalarymyzyň ygtyýarly jemgyýetçilik wekilleri bilen ählihalk ýygnaklaryny geçirip, iň wajyp syýasy, ykdysady, durmuş meseleleri çözmek baradaky asylly däplerinden ugur alyp we umumy ykrar edilen demokratik ýörelgelere eýerip, şeýle hem ilatyň giň gatlaklarynyň möhüm jemgyýetçilik-syýasy çözgütleriň kabul edilmegine gatnaşmagyny üpjün etmek maksady bilen döredilen halk häkimiýetiniň ýokary wekilçilikli edarasy — Türkmenistanyň Halk Maslahatynyň döredilmeginiň taryhy, kanunçylyk binýady we onuň ähmiýeti barada giňişleýin çykyş etdi. Hususan-da, 2023-nji ýylyň 24-nji sentýabrynda geçirilen Türkmenistanyň Halk Maslahatynyň nobatdaky mejlisinde ara alnyp maslahatlaşylan meseleler we onuň netijeleri barada anyk maglumatlara esaslanyň giňişleýin düşündirdi. Şeýle-de milli demokratiýanyň kämil nusgasy bolan Türkmenistanyň Halk Maslahatynyň döredilmeginiň taryhy, onuň syýasy-jemgyýetçilik ähmiýeti barada wagyz-nesihat çäreleri, duşuşyklary geçirmek, köpçülikleýin habar beriş serişdelerinde şöhlelendirmek türkmen diplomatiýasynyň milli mekdebiniň professor-mugallymlarynyň we talyp ýaşlarynyň mukaddes borjudygyny belledi.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.