TÜRKMENISTANYŇ BIRLEŞEN MILLETLER GURAMASYNYŇ ÝANYNDAKY HEMIŞELIK WEKILI BILEN GEÇIRILEN TÄSIRLI DUŞUŞYKLAR
2022-nji ýylyň 24-nji dekabrynda Türkmenistanyň Daşary işler ministrliginiň Halkara institutynda halypa diplomat, Türkmenistanyň Gahrymany, Türkmenistanyň Adatdan daşary we Doly ygtyýarly Ilçisi, Türkmenistanyň Birleşen Milletler Guramasynyň ýanyndaky hemişelik wekili, lukmançylyk ylymlarynyň doktory Aksoltan Ataýewanyň gatnaşmagynda Türkmenistanyň Daşary işler ministrliginiň Halkara institutynyň garamagynda hereket edýän Ýaş diplomatlaryň mekdebi tarapyndan gurnalýan “Parahatçylygyň ýaş çaparlary” atly akyl-paýhas bäsleşiginiň I möwsüminiň ýeňijileri hem-de bu mekdebiň agzalary bolan mekdep okuwçylary bilen hünäre ugrukdyryş boýunça okuw sapagy geçirildi. Bu täsirli geçen okuw sapagyna sanly ulgamyň mümkinçiliklerinden peýdalanyp, ýurdumyzyň dürli künjeklerinden mekdep okuwçylary hem teleköpri arkaly gatnaşdylar. Institutymyzyň talyplary hem-de mekdep okuwçylary halypa diplomatdan ýurdumyzyň Birleşen Milletler Guramasy bilen gatnaşyklary, şeýle hem ussat diplomatyň bu hünär ugrundaky tejribesi bilen baglylykda, özlerini gyzyklandyrýan sowallary berip, özleriniň bilim endiklerini has-da kämilleşdirdiler.
Şeýle hem halypa diplomat institutda hereket edýän Türkmenistanyň Durnukly ösüş maksatlary boýunça ylmy-usulyýet merkezinde talyplar bilen okuw sapagyny geçirdi. Onuň dowamynda halypa Ilçi türkmen diplomatiýasynyň çäklerinde gazanylan tejribe, Türkmenistanyň BMG bilen hyzmatdaşlygyň häzirki ýagdaýy we geljekdäki ikitaraplaýyn gatnaşyklary mundan beýläk hem ösdürmekde öňde durýan wezipeler barada gürrüň berdi.
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby,
PÝÇ-niň I möwsüminiň ýeňijisi.