Türkmenistanda britan ýokary okuw mekdebiniň bölümini açmak hakynda maslahat
2023-nji ýylyň 30-njy maýynda Beýik Britaniýanyň “Glasgow Caledonian University London Campus” ýokary okuw mekdebiniň professory we “Global European Diplomacy Academy, Campus Berlin” şahamçasynyň ýolbaşçysy Nabil Aýadiniň we “Global European Diplomacy Academy, Campus Berlin” şahamçasynyň ýolbaşçynyň orunbasary, doktor Myşka Gužkowskanyň gatnaşmagynda Beýik Britaniýanyň ýokary okuw mekdepleriniň Türkmenistanda şahamçalaryny açmak mümkinçilikleri boýunça wideoaragatnaşyk arkaly maslahat geçirildi. Bu maslahata Türkmenistanyň Bilim ministrliginiň, ýurdumyzyň ýokary okuw mekdepleriniň, şol sanda Türkmenistanyň Daşary işler ministrliginiň Halkara gatnaşyklary institutynyň wekilleri gatnaşdylar. Sanly ulgam arkaly geçen maslahatyň dowamynda britaniýaly bilermenler öz ýurtlarynyň ýokary okuw mekdepleri, olaryň mümkinçilikleri barada aýdyp, daşary ýurtlarda açylan şahamçalarynda gazanylan tejribelerini paýlaşdylar.
Merdan BERDINYÝAZOW,
Türkmenistanyň Daşary işler ministrliginiň
Halkara gatnaşyklary institutynyň mugallymy.