Türkmenistan we BMG: hyzmatdaşlygyň täze gerimi
2024-nji ýylyň 20-nji iýunynda Türkmenistanyň Daşary işler ministrliginiň Halkara gatnaşyklary institutynyň Türkmenistanyň diplomatiýasynyň möhüm ugurlary boýunça okuw merkeziniň gurnamagynda “Öňüni alyş diplomatiýasy” ugry boýunça institutymyzyň talyplarynyň gatnaşmagynda “Türkmenistanyň Birleşen Milletler Guramasynyň Baş Assambleýasynyň (BMG) 79-njy sessiýasynyň wise-başlyklygyna biragyzdan saýlanylmagy” atly okuw sapagy geçirildi. Okuw sapagyny Halkara gatnaşyklary we diplomatiýa kafedrasynyň müdiri, taryh ylymlarynyň doktory, professor, Türkmenistanyň ussat diplomaty Amangeldi Rahmanow alyp bardy.
Okuw sapagynda professor A.Rahmanow 2024-nji ýylyň 6-njy iýunynda Türkmenistanyň BMG-niň Baş Assambleýasynyň 79-njy mejlisiniň başlygynyň orunbasarlygyna biragyzdan saýlanylmagynyň ähmiýeti barada gürrüň berip, onuň Türkmenistanyň alyp barýan daşary syýasatynyň dünýä jemgyýetçiligi tarapyndan giň goldawa eýe bolýandygynyň ykrarnamasydygyny nygtady. Şeýle-de, Türkmenistanyň durmuşa geçirýän oňyn Bitaraplyk syýasaty köptaraply diplomatiýany, şol sanda öňüni alyş, ykdysady, energetika, ulag, suw, ylym-bilim, medeni, ynsanperwer, parlament, lukmançylyk, ekologiýa, ýaşlar, sport diplomatiýasyny ilerletmek üçin giň mümkinçilikleri şertlendirýändigini belledi. Munuň özüniň döwletleriň we halklaryň arasyndaky özara düşünişmegi, dostluk we ynanyşmak gatnaşyklaryny pugtalandyrmaga, dürli ulgamlarda özara bähbitli hyzmatdaşlygy ösdürmäge ýardam edýändigini barada aýdyp geçdi.
Mälim bolşy ýaly, Türkmenistan BMG-niň Baş Assambleýasynyň mejlisiniň wise-başlyklygyna 8-nji gezek saýlanýar. Ozal Baş Assambleýasynyň 58-nji, 62-nji, 64-nji, 68-nji, 71-nji, 75-nji we 77-nji mejlisiniň başlygynyň orunbasarlygyna saýlanypdy.
Okuw sapagynyň ahyrynda oňa gatnaşyjylar özlerini gyzyklandyrýan soraglary berdiler.
Aýlar NEDIROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakuletiniň I ýyl talyby.