Türkmen halysynyñ milli muzeýine gezelenç gurnaldy
2025-nji ýylyň 5-nji maýynda Türkmenistanyň Daşary işler ministrliginiň Halkara gatnaşyklary institutynyň Jemgyýeti öwreniş ylymlary kafedrasynyň gurnamagynda, kafedranyň ýanynda hereket edýän “Paýhas we parasat” atly ylmy gurnagynyň we Ýaş diplomatlar mekdebiniň bilelikde gurnamagynda Türkmen halysynyñ milli muzeýine gezelenç gurnaldy. Bu gezelenje “Paýhas we parasat” atly ylmy gurnagynyň hem-de Ýaş diplomatlar mekdebiniň agzalary gatnaşdylar. Gezelenjiň dowamynda oňa gatnaşyjylar türkmen zenanlarynyň yhlasyndan syzlyp çykan deňsiz-taýsyz, gadymy türkmen halylarynyň dokalyş taryhy, milli nagyşlaryň döreýşi, haly gölleriniň tapawutly aýratynlyklary barada täsin maglumatlar bilen tanyşdylar. Bu muzeýde özüniň nepisligi, dokalyş aýratynlygy, döreýiş taryhy boýunça tapawutlanýan 2000-e golaý haly eksponatlary bar.
Türkmen zenanlarynyň müňýyllyklaryň dowamynda döreden milli gymmatlyklaryny gorap saklamakda, öz milliligimize bolan söýgini ösdürmekde we gelejekki nesillerimize ýetirmekde şeýle gezelençleriň ähmiýeti örän uludyr. ÝUNESKO-nyň Adamzadyň maddy däl medeni mirasynyň görnükli nusgalarynyň sanawyna girizilen türkmen halysynyň dünýä mirasyndaky ornuny dabaralandyrmak, nesilden-nesle geçip gelýän halyçylyk sungatyny ýaş nesillerimize ýetirmek maksady bilen guralan bu gezelenç talyp ýaşlarda uly täsir galdyrdy.
Aýnur HUDAÝBERGENOWA,
Türkmenistanyñ Daşary işler ministrliginiñ
Halkara gatnaşyklary institutynyñ
Halkara žurnalistikasy fakultetiniñ III ýyl talyby.