Türkmen halysynyň milli muzeýine gezelenç guraldy
2022-nji ýylyň 13-nji oktýabrynda Türkmen halysynyň milli muzeýine Türkmenistanyň Daşary işler ministrliginiň Halkara gatnaşyklary institutynyň talyp gyzlarynyň gatnaşmagynda gezelenç guraldy. Gezelenjiň dowamynda talyp gyzlar gadymy türkmen halylarynyň dokalyş taryhy, haly gölleriniň tapawutly aýratynlyklary barada gyzykly maglumatlar öwrendiler. Bu muzeýde özüniň nepisligi, dokalyş aýratynlygy boýunça 2000-e golaý haly eksponatlary bar. Şol halylaryň arasynda 2001-nji ýylda dokalyp 2003-nji ýylda ululygy boýunça Ginnesiň rekordlar kitabyna girizilen halyny hem görmek bolýar. Mundan başga-da, muzeýde 2017-nji ýylda ýurdumyzda geçirilen Ýapyk binalarda we söweş sungaty boýunça V Aziýa oýunlaryndaky sportuň dürli görnüşleriniň haly nagyşlarynda şekillendirilen ajaýyp halysy hem bar.
Halkymyzyň müňýyllyklaryň dowamynda döreden milli gymmatlyklaryny gorap saklamak we geljekgi nesillerimize ýetirmek, milli mirasymyza bolan söýgini döretmek maksady bilen ýurdumyzda guralýan gezelençleriň, sergileriň, çäreleriň ähmiýeti uludyr.
Oguljahan JOBBOROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
Hukugy fakultetiniň 2-nji ýyl talyby.