TÜRKMEN-BELARUS HYZMATDAŞLYGYNA BAGYŞLANAN OKUW SAPAGY
2025-nji ýylyň 22-nji maýynda türkmen diplomatiýasynyň milli
mekdebi bolan Türkmenistanyň Daşary işler ministrliginiň Halkara
gatnaşyklary institutynda bu ýokary okuw mekdebiniň rektory
G.Ýusupowa bilen Belarus Respublikasynyň P.M.Maşerow adyndaky
Witebsk döwlet uniwersitetiniň prorektory A.Mehowiçiň arasynda
duşuşyk geçirildi.
Duşuşygyň başynda Türkmenistan bilen Belarus Respublikasynyň
arasyndaky ikitaraplaýyn hyzmatdaşlygyň ileri tutulýan ugurlary,
hususan-da, ylym-bilim ulgamyndaky hyzmatdaşlyk ara alnyp
maslahatlaşyldy.
Duşuşykdan soňra, Belarus Respublikasynyň P.M.Maşerow
adyndaky Witebsk döwlet uniwersitetiniň prorektory A.Mehowiçiň
gatnaşmagynda “Bilim ulgamynda türkmen-belarus mümkinçilikleri”
atly tema boýunça okuw sapagy geçirildi. Oňa Belarus
Respublikasyndan gelen wekiliýetiň agzalary, Türkmenistanyň Daşary
işler ministrliginiň Halkara gatnaşyklary institutynyň rektory, professor-
mugallymlary we talyp ýaşlary gatnaşdylar.
Okuw sapagynyň dowamynda hormatly myhman Türkmenistan
bilen Belarus Respublikasynyň arasyndaky syýasy-diplomatik, söwda-
ykdysady, medeni-ynsanperwer ugurlar boýunça ýetilen sepgitler we
durmuşa geçirilen işler barada, şeýle hem häzirki wagtda bilim
ulgamyny ösdürmekde alnyp barylýan ikitaraplaýyn hyzmatdaşlyk
dogrusynda giňişleýin gürrüň berdi.
Täsirli geçen okuw sapagynyň ahyrynda institutyň talyplary
hormatly myhmana özlerini gyzyklandyrýan sowallary berdiler.
Şeýle hem myhman institutyň çäginde hereket edýän “Türkmen
diplomatiýasynyň taryhy” muzeýine, “Ýaş diplomatyň sesi” atly
elektron gazetiniň redaksiýasyna baryp, olar dogrusynda gyzykly
maglumatlar bilen tanyşdy.
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.