TEJRIBELI ILÇI BILEN SÖHBETDEŞLIK
2022-nji ýylyň 4-nji aprelinde Türkmenistanyň Daşary işler ministrliginiň Halkara gatnaşyklary institutynda Türkmenistan bilen Amerikanyň Birleşen Ştatlarynyň arasyndaky diplomatik gatnaşyklaryň ýola goýulmagynyň 30 ýyllygy mynasybetli ABŞ-nyň Türkmenistandaky Adatdan daşary we Doly ygtyýarly ilçisi Mettýu S. Klimow bilen institutyň Halkara žurnalistikasy fakultetiniň talyplarynyň arasynda duşuşyk geçirildi. Bu duşuşyk institutyň Dünýä dilleri kafedrasynyň uly mugallymy Maýa Orazowanyň alyp barmagynda gurnaldy.
Duşuşygyň dowamynda ilçi diplomatik gatnaşyklaryň ýola goýulmagynyň ilkinji günlerinden başlap, Türkmenistan bilen ABŞ-nyň arasynda ähli ugurlar boýunça uzakmöhletleýin we özara bähbitli hyzmatdaşlygyň ösdürilmegine aýratyn ähmiýet berilýändigini belledi. Aýratyn-da, ilçi söwda-ykdysady gatnaşyklary pugtalandyrmaga, amatly maýa goýum gurşawyny döretmäge, tehnologiýalar, innowasion ulgamlarda gatnaşyklary işjeňleşdirmäge üns berilýändigini nygtady.
Mundan başga-da, ilçi öz çykyşynda medeni mirasy gorap saklamak boýunça bilelikdäki taslamalaryň amala aşyrylmagy, ABŞ-nyň öňdebaryjy ylym-bilim merkezleri bilen netijeli gatnaşyklaryň çuňlaşdyrylmagy bilen birlikde, bilim we medeniýet ugry boýunça gatnaşyklaryň giňeldilýändigini aýtdy. Bu ugurda anyk ylmy edaralar bilen iki ýurduň arasynda köpsanly işleriň durmuşa ornaşdyrylandygyny, ABŞ-nyň abraýly ýokary okuw mekdepleri bilen hyzmatdaşlygy ýola goýmak boýunça gepleşikleriň geçirilendigini belledi. Şeýle-de hormatly ilçi türkmen-amerikan gatnaşyklarynyň 30 ýyllyk tejribesine üns çekmek bilen, bu döwürde baglaşylan ylalaşyklar we şertnamalar, olaryň ähmiýeti, halkara guramalarynyň işiniň çygryndaky özara bähbitli çözgütler dogrusynda durup geçdi.
Duşuşygyň barşynda talyp ýaşlar hormatly myhmana türkmen-amerikan gatnaşyklarynyň geljegi, saýlan hünär ugurlary bilen bagly özlerini gyzyklandyrýan sowallary berdiler. Köp ýyllyk iş tejribesi bolan diplomat özüne berlen sowallara giňişleýin jogap berdi hem-de ýaş žurnalistlere işlerinde ussat bolmaklary üçin köp okamagy, köpräk adamlar bilen işleşmegi, bolup geçýän wakalary seljerip başarmagy we jemgyýete dogry ýetirmegi maslahat berdi.
Batyrmuhammet ORAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň I ýyl talyby.