Täsirli geçen döredijilik duşuşygy
2024-nji ýylyň 28-nji noýabrynda Türkmenistanyň Daşary işler ministrliginiň Halkara gatnaşyklary institutynyň Žurnalistikanyň nazaryýeti we amalyýeti kafedrasynyň guramagynda “Pähim-paýhas ummany Magtymguly Pyragy” ýyly mynasybetli döredijilik duşuşygy geçirildi. Bu çärä “Magtymguly” operasynda akyldar şahyryň ýaşlyk ýyllaryndaky keşbini ussatlyk bilen janlandyran Arkadag şäheriniň Aman Gulmämmedow adyndaky döwlet drama teatrynyň ýokary derejeli drama artisti, Türkmenistanyň at gazanan artisti Ýagmyr Gurbannazarow, şeýle hem institutyň mugallymlarydyr talyp ýaşlary gatnaşdylar.
Döredijilik duşuşygynyň dowamynda Ýagmyr Gurbannazarow öz janlandyran keşbi, şahyryň hupbatly durmuş ýolunyň pursatlary barada gyzykly gürrüňleri berdi. Şeýle hem halypa artistiň Magtymguly Pyragynyň goşgularyny labyzly okamagy çäräniň täsirliligini has-da artdyrdy. Ussatlyk bilen okalan akyldaryň çuňňur manyly çeper goşgulary talyplaryň ruhy dünýäsini galkyndyrdy.
Duşuşygyň dowamynda talyplar özlerini gyzyklandyrýan soraglara giňişleýin jogap aldylar. Çäräniň ahyrynda oňa gatnaşyjylar beýik akyldaryň arzuwlan berkarar döwranyny türkmen halkyna peşgeş beren Gahryman Arkadagymyza, Arkadagly Gahryman Serdarymyza hoşallyk sözlerini beýan etdiler.
Aýjennet ROZYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
I ýyl talyby.