Talyplaryň Halkara ynsanperwer hukugy boýunça halkara bäsleşikde üstünlikli çykyşy
2025-nji ýylyň 21–25-nji apreli aralygynda Türkmenistanyň Daşary işler ministrliginiň Halkara gatnaşyklary institutynyň talyplar topary Halkara Gyzyl Haç Komitetiniň guramagynda Russiýa Federasiýasynyň Moskwa şäherinde geçirilen iň abraýly bäsleşikleriň biri hasaplanýan F.F.Martens adyndaky Halkara ynsanperwer hukugy boýunça bäsleşige gatnaşyp, dünýäniň birnäçe ýokary okuw mekdepleriniň arasynda üstünlikli çykyş edip, gowy netijeleri gazanmagy başardylar.
F.F.Martensiň adyny göterýän bu bäsleşige Türkmenistanyň Daşary işler ministrliginiň Halkara gatnaşyklary institutynyň talyplar topary eýýäm birnäçe ýyldan bäri gatnaşyp gelýärler. Bu bäsleşik Halkara Gyzyl Haç Komitetiniň (HGHK) guramagynda GDA ýurtlarynyň öňdebaryjy hukuk bilimlerini berýän ýokary okuw mekdepleriniň talyplarynyň arasynda geçirilýär.
Bu ýyl Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň uly mugallymy Dürli Ballyýewanyň ýolbaşçylygyndaky talyplardan ybarat bolan topar, ýagny Intizar Tagannyýazowa, Begmuhammet Ataýew we Ýusup Karataýew bäsleşige gatnaşmaga hukuk gazandylar. Bäsleşige 11 döwleiň ýokary okuw mekdepleriniň talyplaryndan düzülen 28 topar gatnaşyp, ýaryş örän çekeleşikli geçdi.
Bäsleşigiň netijelerine görä, Türkmenistanyň Daşary işler ministrliginiň Halkara gatnaşyklary institutynyň topary gowy netijeleri görkezip, olara emin agzalary tarapyndan ýokary baha berildi. Emin agzalary tarapyndan toparlary kesgitlemekde halkara ynsanperwer hukugy we halkara hukugy baradaky bilimlerini, bu baradaky pikirlerini erkin beýan edip bilmek, bu meselelerde ýüze çykýan çylşyrymly ýagdaýlar boýunça jedel etmek we olary çalt çözmek ukyplary göz öňünde tutuldy. Netijede, talyplarymyz guramaçylar we Halkara Gyzyl Haç Komiteti tarapyndan diplomlar bilen sylaglandyryldy. Şeýle bäsleşiklere gatnaşmak halkara hukugy boýunça bilimleri çuňlaşdyrmaga we halkara ynsanperwer hukugynyň iş ýüzünde nähili durmuşa geçirilýändigine düşünmäge mümkinçilik döredýär, şeýle hem ýurdumyzyň halkara hyzmatdaşlygynyň has-da artmagyna ýakyndan ýardam edýär. Şeýle bäsleşikleriň we üstünlikleriň höwrüniň köp bolmagyny tüýs ýürekden arzuw edýäris!
Güneş ÝAGMYROW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.
Çeşme:
https://ashgabat.in/2025/04/27/f-f-martens-adyndaky-halkara-ynsanperwer-hukugy-boyunca-baslesik-gecirildi