![Talybymyz — Şa serpaýyň eýesi! surady](https://iirmfa.edu.tm/images/posts/tahyaly_1719404450.webp)
26/06/2024
4855
Talybymyz — Şa serpaýyň eýesi!
2024-nji ýylyň 26-njy iýunynda Türkmenistanyň Magtymguly adyndaky milli sazly drama teatrynda Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşigiň çäklerinde döredijilik bilen meşgullanýan ýaşlaryň arasynda yglan edilen «Pähim-paýhas ummany Magtymguly Pyragy» atly bäsleşigiň ýeňijilerini sylaglamak dabarasy geçirildi. Dabaranyň başynda hormatly Prezidentimiziň bäsleşigiň ýeňijilerine iberen Gutlagy okaldy.
Gutlagda döwlet Baştutanymyz, hususan-da, şeýle belleýär: «Beýik şahyrymyzyň doglan gününiň 300 ýyllygynyň giňden bellenilýän ýylynda ýurdumyzyň döredijilik bilen meşgullanýan ýaşlarynyň arasynda yglan edilen «Pähim-paýhas ummany Magtymguly Pyragy» atly bäsleşigiň ýeňijileriniň dabaraly ýagdaýda sylaglanylmagynyň aýratyn manysy bardyr. Biz geljekde hem bu döredijilik bäsleşigini yzygiderli geçirip, sungata höwesek ýaşlarymyzyň zehinini, ukyp-başarnyklaryny açyp görkezmekleri üçin ähli zerur şertleri dörederis».
«Pähim-paýhas ummany Magtymguly Pyragy» atly bäsleşigiň ýeňijileriniň hatarynda Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 3-nji ýyl talyby Gurbansähet Gurbansähedowyň hem bolmagy biziň üçin aýratyn buýsandyryjydyr. Biz hem öz gezegimizde talybymyzyň mynasyp bolan Şa serpaýy bilen tüýs ýürekden gutlaýarys!
Mähriban HUDAÝGULYÝEWA,
Türkmenistanyň Daşary işler
ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.