Suw diplomatiýasynyň halkara gatnaşyklaryndaky orny
Häzirki zaman dünýäde parahatçylygyň, durnuklylygyň hem-de ösüşiň üpjün edilmegi köp babatda suw bilen baglanyşykly wezipeleriň oýlanyşykly çözülmegine bagly diýsek ýalnyşmarys. Gahryman Arkadagymyzyň belleýşi ýaly, dünýäniň ähli halklary üçin suw durmuşyň we bolçulygyň mukaddes çeşmesidir. Türkmenistan suwdan peýdalanmagyň we suw serişdeleriniň döwletler üçin deň derejede elýeterli bolmagynyň adalatly, köptaraplaýyn bähbitleri nazara almaga esaslanýan ählumumy we sebit ulgamlaryny döretmek boýunça halkara tagallalaryny utgaşdyrmaga suw diplomatiýasynyň esasy maksady hökmünde garaýar.
Hormatly Prezidentimiziň parasatly ýolbaşçylygynda ýurdumyzda ýokary bilimiň ylmy binýadyny we hilini ýokarlandyrmaga aýratyn üns berilýär. Ýurdumyzyň suw diplomatiýasyny ylmy taýdan has-da içgin öwrenmek maksady bilen 2018-nji ýylyň 20-nji dekabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkezini açmak baradaky Karara gol çekildi.
Okuw merkeziniň alyp barýan işiniň esasy wezipesi Türkmenistanyň Prezidentiniň dostlukly,parahatsöýüjilikli daşary syýasatyny, şeýle hem energetika,ulag we suw diplomatiýasy boýunça netijeli halkara hyzmatdaşlygy alyp barmaga gönükdirilen başlangyçlaryny hem-de olaryň iş ýüzinde durmuşa geçirilişini çuňňur öwrenmek esasynda hünär öwreniş we kämilleşdiriş maksatly okuwlary guramak bolup durýar. Okuw merkeziniň çäklerinde amala aşyrylýan ylmy-barlag işleri we geçirilýän ýöriteleşdirilen okuwlary bu möhüm wezipeleri çözmeklige gönükdirilýär. Merkeziň okuw işleri talyplar üçin niýetlenen ýörite we fakultatiw okuw sapaklary, maksatnamalaýyn okuwlary görnüşinde alnyp barylýar.
Türkmenistanyň suw diplomatiýasynyň esasy wezipeleriniň biri Birleşen Milletler Guramasynyň derejesinde syýasy-hukuk häsiýetli hemmetaraplaýyn resminamany-Birleşen Milletler Guramasynyň suw strategiýasyny işläp taýýarlamagy öňe sürmekdir. Şunuň bilen baglylykda bolsa okuw merkezinde okuwlaryň täze tapgyry öz işine başlady. Türkmenistanyň diplomatiýasynyň möhüm ugurlary boýunça okuw merkeziniň Düzgünnamasyna laýyklykda, täze okuw tapgyrynda okuw merkeziniň diňleýjileri hökmünde institutyň ähli fakultetleriniň talyplaryndan düzülen topar gatnaşýar. Tassyklanan meýilnama boýunça umumy we söhbet sapaklary geçirilýär. Geçirilýän sapaklar interaktiw usulda prezentasiýalar hem-de wideoşekilli maglumatlary ulanmak arkaly alnyp barylýar.
Bu gün hem Türkmenistanyň diplomatiýasynyň möhüm ugry boýunça “Suw diplomatiýasy” ugry boýunça okuw merkezinde Türkmenistanyň Daşary işler ministrliginiň wekiliniň gatnaşmagynda “Suw diplomatiýasynyň halkara gatnaşyklary ulgamyndaky ähmiýeti we wajyp orny” atly okuw sapagy geçirildi. Okuw sapagynyň dowamynda Türkmenistanyň Daşary işler ministrliginiň Halkara gatnaşyklary institutynyň Halkar hukugy fakultetiniň talyplary A.Esedow hem-de T.Hoşanowa suw diplomatiýasynyň esasy ugurlary, bu ugurlarda hormatly Prezidentimiziň alyp barýan içeri we daşary syýasaty barada ýörite prezentasiýalar bilen çykyş etdiler.
Beggeldi GUTLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara
hukugy fakultetiniň talyby.