Suw diplomatiýasyna bagyşlanan okuw sapagy
2022-nji ýylyň 17-nji oktýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň guramagynda suw diplomatiýasy ugry boýunça nobatdaky okuw sapagy geçirildi. Okuw sapagyny Türkmenistanyň Oba hojalyk we daşky gurşawy goramak ministrliginiň Daşky gurşawy goramak gullugynyň Daşky gurşawy goramak we ekologiýa seljermesi bölüminiň hünärmeni Uzukjemal Paşşyýewa alyp bardy. Bu okuw sapagy "Türkmenistanyň suw diplomatiýasy: durnukly ösüş we Aral deňizi" atly tema boýunça geçirildi. Okuw sapagynyñ dowamynda çykyş eden hünärmen häzirki wagtda sebitde ekologiýa, suw hojalygy we sosial-ykdysady ýagdaýy gowulandyrmakda hem-de durnukly ösüşi üpjün etmekde Aral deňziniň meseleleriniň çözülmeginiň wajyp ähmiýeti, bu babatda 2008-nji ýylyň 11-nji dekabryndaky "Aral deňzini halas etmegiň Halkara guramasyna BMG-niň Baş Assambleýasynyň synçysy derejesini bermek hakynda" , 2018-nji ýylyň 12-nji aprelindäki BMG-niň we Araly halas etmegiň Halkara gaznasynyň arasynda hyzmatdaşlyk etmek hakynda kabul edilen Rezolýusiýasylary barada gürrüň etdi.
Durdynýaz GUWANJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.