SUW DIPLOMATIÝASY BOÝUNÇA OKUW MASLAHATY GEÇIRILDI
Häzirki zaman dünýäsinde parahatçylygy, durnuklylygy we ösüşi üpjün etmek, esasan, suw çeşmeleri bilen baglanyşykly meseleleriň oýlanyşykly çözülmegine baglydyr. Döwlet Baştutanymyzyň belleýşi ýaly, dünýäniň ähli halklary üçin suw durmuşyň we bolçulygyň mukaddes çeşmesidir. Mälim bolşy ýaly, suw diplomatiýasy – Türkmenistanyň daşary syýasatynyň esasy ugurlarynyň biri bolup durýandyr. 2018-nji ýylyň 20-nji dekabrynda Türkmenistanyň Daşary işler ministrliginiň Halkara gatnaşyklary institutynyň düzüminde Türkmenistanyň diplomatiýasynyň möhüm ugurlary boýunça okuw merkeziniň açylmagy ýurdumyzyň daşary syýasatynyň energetika, ulag, suw we beýleki ugurlarda amala aşyrýan işlerini öwrenmäge ýardam berýär.
Bu babatda, 2022-nji ýylyň 3-4-nji oktýabry aralygynda Türkmenistanyň Daşary işler ministrliginiň Halkara gatnaşyklary institutynda Merkezi Aziýanyň sebitleýin ekologiki merkezi tarapyndan halkara bilermenleriň gatnaşmagynda suw diplomatiýasy we halkara suw hukugy boýunça talyplar we mugallymlar üçin göni wideoaragatnaşyk arkaly okuw maslahaty gurnaldy.
Bu okuw maslahatynyň esasy maksady suw hyzmatdaşlygy, suw howpsuzlygy we suw diplomatiýasy düşünjeleriniň arasyndaky tapawudyny giňişleýin düşündirmekden ybarat boldy. Okuw maslahatyny taslamanyň halkara bilermeni Ana Eliza Kaşkao alyp bardy.
Töfe HOŞANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara jemagat hukugy ugrunyň magistranty.