Sagdyn beden – sagdyn ruh
2022-nji ýylyň 17-nji fewralynda Türkmenistanyň Daşary işler ministrliginiň Halkara gatnaşyklary institutynda ýaş nesliň ýaramaz zyýanly endiklerden daşda durmagy, möwsümleýin, ýokanç we ýokanç däl keselleriň öňüni almak maksady bilen wagyz-nesihat çäresi geçirildi. Wagyz-nesihat çäresine Türkmenistanyň Saglygy goraýyş we derman senagaty ministrligine degişli hassahanalaryň lukmanlary hem-de institutyň professor-mugallymlary we talyp ýaşlary gatnaşdylar.
Wagyz-nesihat çäresinde Aşgabat şäheriniň Arassaçylyk we keselleriň ýaýramagyna garşy göreşmek gullugynyň lukmany Ogulmaral Allabaýewa, AIDS merkeziniň lukmany Sona Mämmetdurdyýewa, narko-psihologiýa lukmany Akbibi Täçmämmedowa, deri we weneriki keselleri lukmany Serdar Ismailow, Türkmenistanyň Saglygy goraýyş we derman senagaty ministrliginiň Saglygy goraýşyň habarlar merkeziniň lukmany Ata Bopbyýew çykyş edip, zyýanly endikleriň ýaşlara ýetirýän täsiri, temmäki önümleriniň we alkogol içgileriniň ýetirýän zyýany, AIW/AIDS keselleriniň köpçülige howp döredýändigi barada, gyş paslynda ýiti respirator ýokanç keselleriniň ýaýraýandygyny aýdyp, adam bedenine ýetirýän zyýany hakda gürrüň berdiler. Şeýle hem şol kesellerden goranmagy, bedenterbiýe we sport bilen meşgullanmagy maslahat berdiler. Zyýanly we ýokanç keselleriniň öňüni almak maksady bilen, ýygy-ýygydan mekdeplerde, edara-kärhanalarda, ýokary okuw mekdeplerinde wagyz-nesihat işleri alnyp barylýar.
Çäräniň ahyrynda oňa gatnaşanlar, halkymyzyň sagdyn, eşretli durmuşda ýaşamagy ugrunda uly tagallalary edýän hem-de ynsan saglygyny hemme zatdan ileri tutýan milli Liderimize tüýs ýürekden alkyş sözlerini aýtdylar.
Döwlet JUMAGYLYJOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň II ýyl talyby.