Rus diliniň halkara güni mynasybetli bäsleşik
2022-nji ýylyň 6-njy iýunynda Türkmenistanyň Daşary işler ministrliginiň Halkara gatnaşyklary institutynda Dünýä dilleri kafedrasynyň «Lingvo World» gurnagynyň guramagynda Birleşen Milletler Guramasynyň senenamasyndaky rus diliniň halkara güni mynasybetli gurnagyň agzalarynyň arasynda bäsleşik geçirildi.
Bäsleşigiň dowamynda institutymyzyň talyplary rus diliniň grammatikasy, durnukly söz düzümleri, rus edebiýaty boýunça özara bäsleşdiler. Olar özlerine berlen sowallara ussatlyk bilen jogap bermegi başardylar. Bäsleşigiň dowamynda talyplaryň rus dilinde goşgy okap bermekleri dabara aýratyn öwüşgin çaýdy. Bäsleşigiň ahyrynda iki toparyň hem görkezen netijeleri deň boldy. Şeýle bäsleşikleriň dowamly geçirilip durulmagy talyp ýaşlaryň daşary ýurt dillerinde erkin gürlemek endikleriniň ösmegine ýardam edýär. Bäsleşigiň ahyrynda ýurdumyzda talyp ýaşlara daşary ýurt dillerini öwrenmäge döredilýän ajaýyp şertler üçin hormatly Prezidentimize hoşallyk sözleri aýdyldy.
Aýgül MÄMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň I ýyl talyby.