Resmi derejede geçen duşuşyk
2022-nji ýylyň 19-njy aprelinde Türkmenistanyň Daşary işler ministrliginiň Halkara gatnaşyklary institutynda Malaýziýanyň Türkmenistandaky Ilçihanasynyň işleri wagtlaýyn ynanylan wekili jenap Haýrul Hezri Bin Arefi bilen Halkara gatnaşyklary institutynyň rektory J.Gurbangeldiýewiň arasynda duşuşyk geçirildi.
Duşuşygyň dowamynda institutyň rektory milli diplomatiýanyň ýokary okuw mekdebiniň döredilmeginiň taryhy, gurluşy, fakultetleriň hem-de kafedralaryň işleri, dürli ýurtlaryň ylym-bilim ojaklary bilen alnyp barylýan halkara hyzmatdaşlygy, institutda hereket edýän okuw we ylmy merkezler barada giňişleýin gürrüň berdi. Onuň aýtmagyna görä, iki ýurduň arasyndaky dostlukly gatnaşyklar, özara bähbitli hyzmatdaşlyk işjeň ösdürilýär.
Jenap Haýrul Hezri Bin Arefin öz gezeginde Malaýziýanyň Daşary işler ministrliginiň Halkara gatnaşyklary we diplomatiýa instituty barada, Malaýziýanyň bilim ulgamynda toplanan tejribesi hakynda gürrüň berdi. Mundan başga-da, wekil öz çykyşynda Halkara gatnaşyklary instituty bilen Malaýziýanyň arasyndaky hyzmatdaşlygy mundan beýläk-de ösdürmek babatda birnäçe teklipleri öňe sürdi.
Resmi duşuşykdan soňra jenap Haýrul Hezri Bin Arefin üçin gurnalan çäräniň dowamynda abraýly myhman institutyň muzeýi, nemes kitaphanasy, türk kitaphanasy we ýakynda açylan Hindistan burçy, şol sanda okuw studiýasy hem-de «Parahatçylygyň ýaş çaparlary» akyl-paýhas bäsleşigi geçirilýän türkmeniň Ak öýi bilen ýakyndan tanyş boldy.
Merdan BERDINYÝAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa
kafedrasynyň
mugallymy.