Öňüni alyş diplomatiýasy boýunça täsirli okuw sapagy
2024-nji ýylyň 15-nji martynda Türkmenistanyň Daşary işler ministrliginiň Halkara gatnaşyklary institutynyň Türkmenistanyň diplomatiýasynyň möhüm ugurlary okuw merkeziniň «Öňüni alyş diplomatiýasy» ugry boýunça «Harby-syýasy gapma-garşylyklary çözmegiň güýç ulanmazlyk usullary» atly okuw sapagy geçirildi. Okuw sapagyny institutyň Halkara gatnaşyklary we diplomatiýa kafedrasynyň mugallymy, Türkmenistanyň Adatdan daşary we Doly ygtyýarly ilçisi, Türkmenistanyň ussat diplomaty Kakajan Mommadow alyp bardy.
Sapagyň dowamynda K.Mommadow talyplara döwletleriň arasyndaky gapma-garşylyklaryň ýüze çykýan mahaly güýç ulanmazlygyň, ýagny häzirki zaman halkara gatnaşyklarynda gepleşikleriň uly ähmiýetiniň bardygyny belledi. Mundan başga-da, K.Mommadow öz şahsy tejribesinden mysal edip, gepleşikleriň geçirilişi, olaryň görnüşleri we guralyşy babatynda giňişleýin gürrüň berdi.
Sapagyň ahyrynda talyplar halypa diplomata özlerini gyzyklandyrýan soraglary berdiler.
Rejep REJEPOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.