Öňüni alyş diplomatiýasy boýunça okuw sapagy
2024-nji ýylyň 12-nji aprelinde Türkmenistanyň Daşary işler ministrliginiň Halkara gatnaşyklary institutynyň Türkmenistanyň diplomatiýasynyň möhüm ugurlary boýunça okuw merkeziniň «Öňüni alyş diplomatiýasy» ugrunyň çäginde «Parahatçylyk we ynanyşmak – halkara howpsuzlygyň, durnuklylygyň we ösüşiň binýady» atly okuw sapagy geçirildi.
Okuw sapagyny institutyň Halkara gatnaşyklary we diplomatiýa kafedrasynyň uly mugallymy Merdan Berdinyýazow alyp bardy. M.Berdinyýazow talyplara Bitarap Türkmenistanyň parahatçylygy, howpsuzlygy, durnuklylygy pugtalandyrmaga, Durnukly ösüş maksatlaryna ýetmäge degişli sebit we halkara gün tertibindäki esasy meseleleriň deňeçer çözgütlerini işläp taýýarlamaga işjeň gatnaşýandygy barada gürrüň berdi.
Mundan başga-da mugallym M.Berdinyýazow ýakynda Birleşen Milletler Guramasynyň Baş Assambleýasynyň 78-nji sessiýasynyň 63-nji plenar mejlisiniň dowamynda Türkmenistanyň başlangyjy esasynda taryhy Kararnamanyň biragyzdan kabul edilendigini, onuň esasynda 2025-nji ýylyň «Halkara parahatçylyk we ynanyşmak ýyly» diýlip yglan edilendigini belläp, dünýäniň 86 döwleti onuň awtordaşy bolandygyny aýtdy.
Sapagyň ahyrynda talyp ýaşlar mugallyma özlerini gyzyklandyrýan soraglary berdiler.
Rejep REJEPOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.