ÖŇÜNI ALYŞ DIPLOMATIÝASY BOÝUNÇA OKUW SAPAGY GEÇIRILDI
2025-nji ýylyň 15-nji oktýabrynda Birleşen Milletler Guramasynyň Merkezi Aziýa üçin Öňüni alyş diplomatiýasy boýunça sebit merkezinde «ÝHHG: ynamy berkitmek, ynanyşmak we parahatçylyk» atly tema boýunça okuw sapagy geçirildi. Oňa Türkmenistanyň Daşary işler ministrliginiň Halkara gatnaşyklary institutynyň we ýurdumyzyň beýleki ýokary okuw mekdepleriniň talyplary gatnaşdylar.
Okuw sapagyny ÝHHG-niň Aşgabatdaky merkeziniň ýolbaşçysy, Ilçi Wilýam Lif alyp bardy. Okuw sapagynyň dowamynda Ýewropada Howpsuzlyk we Hyzmatdaşlyk Guramasynyň taryhy we esasy ýörelgeleri, üç ölçegli howpsuzlyk ugry, ynamy we hyzmatdaşlygy berkitmek boýunça çäreler hakynda giňişleýin maglumat berildi. Ilçi çykyşynyň dowamynda Merkezi Aziýada parahatçylygy goramakda diplomatiýanyň ähmiýetine, şeýle hem Türkmenistanyň daşary syýasatyndaky ösüşlere aýratyn ünsi çekdi.
Soňra okuw sapagyna gatnaşyjylar üçin interaktiw duşuşyk guraldy we sorag-jogap alşyldy. Bu bolsa türkmen diplomatiýasynyň milli mekdebinde, şeýle hem beýleki ýokary okuw mekdeplerinde bilim alýan talyplaryň özlerini gyzyklandyrýan sowallaryna jogap tapmagynda, özara pikir alyşmagynda aýratyn ähmiýetli boldy.
Hemragylyç NURMÄMMEDOW,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.