Öňüni alyş diplomatiýasy boýunça göçme sapagy
2024-nji ýylyň 6-njy martynda Birleşen Milletler Guramasynyň Merkezi Aziýa üçin Öňüni alyş diplomatiýasy boýunça sebitleýin merkezinde Türkmenistanyň Daşary işler ministrliginiň Halkara gatnaşyklary institutynyň Türkmenistanyň diplomatiýasynyň möhüm ugurlary boýunça okuw merkeziniň «Öňüni alyş diplomatiýasy» ugrunyň talyplarynyň gatnaşmagynda göçme sapagy geçirildi. Okuw sapagyny Merkeziň Adam hukuklary we syýasy meseleler boýunça Geňeşçisi Armands Pupols alyp bardy.
Sapagyň dowamynda Armands Pupols gatnaşyjylara häzirki zamanyň ählumumy wehimleri, BMG-niň parahatçylygy we hyzmatdaşlygy üpjün etmekdäki orny, Merkezi Aziýada parahatçylygy, durnuklylygy hem-de howpsuzlygy gazanmakda öňüni alyş diplomatiýanyň orny barada giňişleýin gürrüň berdi.
Mundan başga-da, A.Pupols Merkezi Aziýa sebitinde Türkmenistanyň Bitaraplygynyň ähmiýeti barada hem-de onuň öňüni alyş diplomatiýasynda uly ornunyň bardygyny aýratyn belledi. Şeýle-de Bitaraplygyň dostlary toparynyň geçirilýän mejlisleriniň ähmiýetini nygtady. Merkezde geçirilen göçme okuw sapagynyň çäginde talyplar özlerini gyzyklandyrýan soraglary berdiler.
Rahym AKMURADOW,
Türkmenistanyň Daşary işler ministrliginiň
Halkara gatnaşyklary institutynyň mugallymy.