OKUW SAPAGY GEÇIRILDI
2024-nji ýylyň 23-nji dekabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkezinde okuw sapagy geçirildi. Oňa institutyň mugallymlary we talyp ýaşlary gatnaşdylar.
Okuw sapagynda Türkmenistanyň Ýaponiýadaky Adatdan daşary we Doly ygtyýarly ilçisi Atadurdy Baýramow türkmen-ýapon gatnaşyklary, olaryň halkara guramalarynyň çäklerindäki hyzmatdaşlygy hem-de Ýaponiýanyň diplomatiýasynyň, protokolynyň, etiketiniň aýratynlyklary barada giňişleýin gürrüň berdi. Duşuşygyň dowamynda Türkmenistanyň ykdysady diplomatiýasynyň esasy ugurlary, olaryň iş ýüzündäki orny we bu babatda döwletiň alyp barýan halkara hyzmatdaşlygy hem-de türkmen-ýapon dostlukly gatnaşyklarynyň taryhy barada bellenilip geçildi.
Duşuşyk talyplar üçin örän täsirli bolup, olar özlerini gyzyklandyrýan sowallaryna jogap aldylar.
Kemal DÖWLETÝAROW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
III ýyl talyby.