“Okatmagyň tehniki serişdeleri arkaly dil endiklerini ösdürmek” atly onlaýn okuw sapagy
2022-nji ýylyň 10-14-nji oktýabry aralygynda Türkmenistanyň Daşary işler ministrliginiň Halkara gatnaşyklary institutynda “Okatmagyň tehniki serişdeleri arkaly dil endiklerini ösdürmek” atly onlaýn okuw sapagy geçirildi. Bu okuw sapagy Malaýziýanyň Bilim minisrtliginiň Iňlis dili okuw merkezi tarapyndan Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň mugallymlary üçin Malaýziýanyň Tehniki Hyzmatdaşlyk Maksatnamasynyň çäginde gurnaldy.
Okuw sapagyna gatnaşyjylar okatmagyň tehniki serişdeleri arkaly dil endiklerini ösdürmegiň möhüm usullary we olaryň netijeliligi barada pikir alyşdylar. Bu okuw sapagynyň dowamynda iňlis dilini talyplara öwretmekde tehniki serişdelerden peýdalanmagyň dürli usullary barada maslahatlaşyldy. Mugallymlar iňlis dilini okatmagyň innowasion usullary, olaryň netijeliligi we birnäçe bilim programmalary bilen baglanyşykly okatmagyň häzirki zaman usullary bilen tanyşdylar. Okuwyň dowamynda mugallymlar iňlis dilinde diňlemek, gürlemek, okamak we ýazmak endiklerini ösdürmäge degişli birnäçe maglumatlary aldylar.
Hormatly Prezidentimiziň baştutanlygynda Türkmenistanda daşary ýurt dillerini okatmagy kämilleşdirmegiň Konsepsiýasyny durmuşa geçirmek, daşary ýurt dilleriniň okadylşyny döwrebaplaşdyrmak we onuň hilini halkara ülňülerine laýyk getirmek maksady bilen ýurdumyzda uly işler alnyp barylýar.
Enejan ORAZMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň iňlis dili mugallymy.