“Nepisligiň nusgasy türkmen halysy” ady bilen baýramçylyk dabarasy geçirildi
2023-nji ýylyň 24-nji aprelinde Türkmenistanyň Daşary işler ministrliginiň Halkara gatnaşyklary institutynyň Ak öýünde Türkmen halysynyň milli baýramy mynasybetli “Nepisligiň nusgasy türkmen halysy” atly aýdym-sazly baýramçylyk dabarasy geçirildi.
Dabara Aşgabat şäher çeper halyçylyk kärhanasynyň halyçysy Annabibi Hannyýewa, Aşgabat şäheriniň 25-nji orta mekdebiniň mugallymy, mährem ene Sülgün Reýimowa we Türkmenistanyň Daşary işler ministrliginiň Halkara gatnaşyklary institutynyň talyp gyzlary gatnaşdylar.
Baýramçylyk dabarasynda türkmen halkynyň gadymy däp-dessurlary halyçylyk, keşdeçilik, jorap örmek sungatlary we beýleki ata-babalarymyzdan, ene-mamalarymyzdan miras galan däp-dessurlarymyz dogrusynda gyzykly gürrüňler edildi.
Dabaranyň dowamynda institutyň talyp gyzlary özleriniň boş wagtlaryny ene-mamalarymyzdan miras galan milli sungatymyzy öwrenmek we döwrebaplaşdyrmak bilen meşgullanýandyklaryny belläp geçdiler. Şeýle-de institutymyzyň aýdymçy talyp gyzlary milli mirasymyzy wasp edýän aýdymlary ýerine ýetirdiler.
Baýramçylyk dabarasynda milliligimizi ösdürmekde, türkmen maşgalasynyň binýadynyň berk bolmagy dogrusynda alyp barýan döwletli işlerinde Gahryman Arkadagymyza, Arkadagly Serdarymyza köp-köp sag bolsunlary aýtdylar.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy.