Magtymguly, sözlär tili türkmeniň
2024-nji ýylyň 28-nji awgustynda paýtagtymyzdaky Erkin döredijilik mekanynyň mejlisler zalynda Türkmen döwlet neşirýat gullugynyň hem-de «Türkmenistan» gazetiniň redaksiýasynyň bilelikde guramagynda «Magtymguly, sözlär tili türkmeniň» ady bilen döredijilik duşuşygy geçirildi. Bu duşuşyga ýurdumyzyň köpçülikleýin habar beriş serişdeleriniň wekilleri, halypa ýazyjy-şahyrlar, döredijilik işgärleri, žurnalistler, talyp ýaşlar, şol sanda Türkmenistanyň Daşary işler ministrliginiň Halkara gatnaşyklary institutynyň žurnalistika ugry boýunça bilim alýan talyplary hem işjeň gatnaşdylar.
Mälim bolşy ýaly, «Pähim-paýhas ummany Magtymguly Pyragy» diýlip atlandyrylan şu ýylymyzda akyldar şahyrymyzyň doglan gününiň 300 ýyllygy halkara derejede dabaralandyrylýar. Türkmeniň ruhy dünýäsiniň Magtymguly Pyragynyň şygryýetinde çeper şöhlelenmegine bagyşlanan duşuşykda hem parasatly şahyrymyzyň ömri we döredijiligi, türkmen edebiýatynyň we medeniýetiniň taryhyna eden umumy täsiri barada gürrüň edildi. Şunuň bilen baglylykda, halypa we ýaş žurnalistler çykyş edip, özleriniň ýürek buýsançlaryny beýan etdiler. Şeýle hem duşuşygyň dowamynda ýaş şahyrlar goşgulary bilen akyldar şahyrymyzyň umumadamzat gymmatlygyna öwrülen baý mirasyny, täze taryhy döwrümizi, ýurdumyzda alnyp barylýan işleri wasp etdiler.
Döredijilik duşuşygynyň ahyrynda oňa gatnaşanlar beýik Magtymgulynyň edebi mirasyny bütin dünýäde dabaralandyrýan türkmen halkynyň Milli Lideri Gahryman Arkadagymyza hem-de Arkadagly Gahryman Serdarymyza alkyş sözlerini aýtdylar.
Peristan TÖRÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.