Magtymguly Pyragynyň filosofiýasy geljeki ösüşlere ruhy binýat
2024-nji ýylyň oktýabr aýynyň 21-25-i aralygynda Türkmenistanyň Gyrgyz Respublikasyndaky Ilçihanasynyň gurnamagynda geçirilen “Magtymgulynyň döredijiliginiň dünýä edebiýatyna goşandy” atly halkara ylmy maslahatyna hem-de Magtymgulynyň saýlanan eserleriniň gyrgyz diline terjime edilen ýygyndysy bilen bagly tanyşdyryş dabarasyna türkmen wekilýeti gatnaşdy. Wekiliýetiň agzalary 2024-nji ýylyň 22-nji oktýabrynda Türkmenistanyň Gyrgyz Respublikasyndaky Ilçihanasynyň gurnamagynda Ýusup Balasagyn adyndaky Gyrgyz Milli uniwersitetiniň ylmy işler boýunça prorektory Mirlan Mukdarowiç Dyldaýew we Gyrgyz Respublikasynyň Daşary işler ministrliginiň Kazy Dikambaýew adyndaky Diplomatik akademiýanyň ylmy işler boýunça prorektory Zaýnidin Karpekowiç Kurmanow bilen duşuşdylar. Şeýle-de şol gün Bişkek şäherindäki Milli taryhy muzeýe gezelenç etdiler.
23-nji oktýabrda türkmen wekiliýeti “Magtymgulynyň döredijiliginiň dünýä edebiýatyna goşandy” atly halkara ylmy maslahatyna hem-de Magtymgulynyň saýlanan eserleriniň gyrgyz diline terjime edilen ýygyndysy bilen bagly tanyşdyryş dabarasyna gatnaşdylar.
Halkara ylmy maslahatda “Magtymguly Pyragynyň ekologiýa ynsanperwerligi” ylmy tema boýunça Jemgyýeti öwreniş ylymlary kafedrasynyň uly mugallymy, filosofiýa ylymlarynyň kandidaty O.S.Ezimowa çykyş etdi. O.S.Ezimowa halkara maslahaty alyp baryp, moderator wezipesini ýerine ýetirdi.“Magtymgulynyň döredijiliginiň watançy ýaşlary terbiýelemekde ähmiýeti” atly ylmy tema boýunça Halkara gatnaşyklary we diplomatiýa kafedrasynyň mugallym öwrenijisi Perhat Mahremow çykyş etdi.
Halkara ylmy maslahat ýokary guramaçylykly we ruhubelentlik, ynanyşmak, halklaryň milli mirasyna hormat goýmak derejesinde geçirildi. Çykyşlarda halklaryň dostluk we doganlyk gatnaşyklaryny berkitmekde Magtymguly Pyragynyň filosofiýasynyň we Bitarap Türkmenistanyň medeni diplomatiýasynyň ähmiýeti aýratyn beýan edildi.
Garaşsyz, hemişelik Bitaraplyk derejesi BMG-niň iki sany Kararnamasy bilen dünýäde ýeketäk tassyk edilen, ykdysady taýdan kuwwatly Türkmenistan döwletimiziň ýeten belent derejesi, türkmen halkynyň ruhy sütüni bolan, Magtymguly Pyragynyň doglan gününiň 300 ýyllygyny has-da dabaralandyrmakda 2024-nji ýylyň 11-nji oktýabrynda Aşgabat şäherinde geçirilen “Döwürleriň we siwilizasiýalaryň özara arabaglanyşygy: parahatçylygyň we ösüşiň binýady” atly halkara forumynyň ähmiýeti we kabul edilen jemleýji resminama barada alymlar çykyş etdiler.
Ýokary derejede geçirilen halkara maslahat barada maglumatlar çäräniň geçirilen güni Türkmenistanyň we Gyrgyz Respublikasynyň habar beriş serişdeleri arkaly halk köpçüligine ýetirildi. Halkara maslahatyna gatnaşyp, tejribe alyşmaklyk wekiliýetiň agzalary üçin täsirli we ähmiýetli boldy.
Bilim işgärlerine, alymlara, ýaş hünärmenlere tejribe alyşmaga döredip berýän mümkinçilikleri üçin Türkmenistanyň Prezidentine, Türkmenistanyň Halk Maslahatynyň Başlygy, türkmen halkynyň Milli Lideri Gahryman Arkadagymyza köp-köp alkyşlar aýdýarys.
Arkadagly Gahryman Serdarymyzyň, Gahryman Arkadagymyzyň janlary sag, belent başlary aman bolsun! Il-ýurt bähbitli, umumadamzat ähmiýetli başlangyçlary hemişe rowaç bolsun!
Perhat MAHREMOW,
Türkmenistanyň Daşary işler ministrliginiň
Halkara gatnaşyklary we diplomatiýa
kafedrasynyň mugallym öwrenijisi.