“Magtymguly Pyragynyň döredijiliginde sagdyn durmuş ýörelgeleri” atly metbugat brifingi
2023-nji ýylyň 24-nji maýynda Türkmenistanyň Daşary işler ministrliginiň Halkara gatnaşyklary institutynda Magtymguly Pyragynyň doglan gününiň 300 ýyllygy mynasybetli “Magtymguly Pyragynyň döredijiliginde sagdyn durmuş ýörelgeleri” atly metbugat brifingi geçirildi. Oňa ýurdumyzyň gazet-žurnallarynda zähmet çekýän döredijilik işgärleri hem-de institutymyzyň professor- mugallymlarydyr talyp ýaşlary gatnaşdylar.
Hormatly Prezidentimiz tarapyndan türkmen halkyny dünýä tanadan, öz milletiniň mertebesini Ýer ýüzünde belende galdyran taryhy şahsyýetlerimiziň hatyralanylmagyna, olaryň Watan öňünde bitiren ägirt hyzmatlarynyň, halkyň hakydasyna ebedilik ýazylan beýik işleriniň doly hem içgin öwrenilip, ýaş nesilleriň arasynda wagyz-ündew edilmegine uly ähmiýet berilýär. Gahryman Arkadagymyzyň 2024-nji ýylda Gündogaryň beýik akyldary, nusgawy şahyrymyz Magtymguly Pyragynyň doglan gününiň 300 ýyllygyny belläp geçmek baradaky Karary hem munuň nobatdaky subutnamasy boldy.
Magtymguly — bu bütin türkmenler üçin, damarlarynda türkmen gany joşýan çeper sözüň muşdaklary üçin iň mähriban, iň guwançly, iň buýsançly at. Belli rus gündogary öwrenijisi W.Bartoldyň belleýşi ýaly, bütin Orta Aziýa halklarynyň arasynda diňe türkmenlerde milli şahyr bolupdyr, ol hem Magtymgulydyr.
Şirinden-şirin şygyrlarynyň üsti bilen pelsepewi garaýyşlary halkyna bagyş eden Magtymguly Pyragynyň goşgularyndaky ynsanperwer pikir-garaýyşlar asyrlar geçse-de gymmatyny ýitirmeýär.
Magtymguly, sözle her ne bileniň,
Özüňe kemlik bil aýtman öleniň,
Taraşlap, şaglatgyl köňle geleniň,
Senden soňkulara ýadygär bolar.
Şahyryň halkymyza miras goýan edebi hazynasyny ylmy esasda seljermek, onuň syrdan doly şygyrlarynyň pelsepewi esaslaryny açyp görkezmek üçin türkmen alymlary ençeme işleri alyp barýarlar. Şunuň bilen baglylykda, akyldar şahyryň şygyrlary giňden öwrenilýär we onuň many-mazmuny halk köpçüligine yzygiderli ýetirilip durulýar. Ynha, şu günki geçirilen metbugat brifinginde hem döredijilik işgärleri tarapyndan alnyp barylýan işler, döredilýän täze eserler dogrusynda giňişleýin gürrüň edildi. Talyplar özlerini gyzyklandyrýan sowallara jaýdar jogaplary aldylar.
Ogulmaýsa AMANMUHAMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we
amalyýeti kafedrasynyň mugallymy.