Magtymguly Pyragynyň doglan gününiň 300 ýyllygyna bagyşlanan metbugat duşuşygy
2023-nji ýylyň 15-nji aprelinde Türkmenistanyň Daşary işler ministrliginiň Halkara gatnaşyklary institutynda Magtymguly Pyragynyň doglan gününiň 300 ýyllygyna bagyşlanyp, «Gündogar edebiýaty we Magtymguly Pyragynyň döredijiligi» atly metbugat duşuşygy geçirildi. Döredijilik duşuşygyna «Edebiýat we sungat» gazetiniň baş redaktory Ogulmaýsa Allaberdiýewa, «Watan» gazetiniň baş redaktory Tawus Kakaýewa hem-de institutyň professor-mugallymlarydyr talyp ýaşlary gatnaşdylar.
Duşuşygyň dowamynda oňa gatnaşyjylar dana şahyryň döredijiligi barada giňişleýin söhbet edip, şahyryň goşgularynyň birnäçesini çeper okaýyşda ýerine ýetirdiler. Magtymguly Pyragynyň doglan gününiň 300 ýyllygyna bagyşlanyp, institutyň Halkara žurnalistikasy fakultetiniň talyplary tarapyndan taýýarlanan wideoşekilleriň görkezilmegi duşuşygyň täsirliligini has-da artdyrdy.
Duşuşygyň ahyrynda oňa gatnaşyjylar milli mirasymyzy dünýä tanatmak, akyldar şahyrymyzyň döredijilik mirasyny çuňňur öwrenmek hem-de geljekki nesillere ýetirmek babatda beýik işleri durmuşa geçirýän Arkadagly Serdarymyza, türkmen halkynyň Milli Lideri Gahryman Arkadagymyza alkyş sözlerini aýtdylar.
Bägül MERDANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.