KÖPÇÜLIKLEÝIN HABAR BERIŞ SERIŞDELERINIŇ WE MAGLUMATLARYŇ SOŇKY UGURLARY BOÝUNÇA TÄSIRLI OKUW
2023-nji ýylyň 23-25-nji maýy aralygynda Ýewropada Howpsuzlyk we Hyzmatdaşlyk Guramasynyň (OSCE) Aşgabatdaky Merkeziniň guramagynda «Žurnalistlere syýasy kommunikasiýa hünärmenlerine bilim bermek ugrunda halkara standartlaryny öňe sürmekde goldaw bermek» atly onlaýn okuw sapagy geçirildi. Ýokary derejede guralan okuw sapagyna Türkmenistanyň Magtymguly adyndaky Türkmen döwlet uniwersitetiniň, Türkmenistanyň Daşary işler ministrliginiň Halkara gatnaşyklary institutynyň, Halkara ynsanperwer ylymlary we ösüş uniwersitetiniň žurnalistika hünäri boýunça bilim alýan talyplary we mugallymlary hem-de ýurdumyzyň köpçülikleýin habar beriş serişdeleriniň žurnlistleri sanly ulgam arkaly gatnaşdylar. Sanly ulgam arkaly geçen okuw sapagyny belarusly professor, ilçi Natalýa Drozd, latwiýaly ylymlaryň doktory Solwita Denisa Lipnies ýaly halkara bilermenler alyp bardylar.
Okuw sapagynyň esasy maksady syýasy kommunikasiýa, sanly žurnalistika ugry boýunça bilim alýan talyplaryň, milli hünärmenleriň ukyplaryny artdyrmaga gönükdirildi. Sapagyň dowamynda halkara bilermenler dünýä syýasatynda sanly diplomatiýanyň we sanly žurnalistikanyň bu günki ýeten derejesini, mümkinçilikleri barada dünýä tejribesiniň mysalynda giňişleýin düşünje berdiler.
Kakageldi AKMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.