Hünär duşuşygy geçirildi
2023-nji ýylyň 14-nji martynda Türkmenistanyň Daşary işler ministrliginiň Halkara gatnaşyklary institutynda Halkara žurnalistikasy fakultetiniň “Ýaş žurnalistler” ylmy-döredijilik gurnagynyň guramagynda ýurdumyzda zähmet çekýän halypa žurnalistler bilen institutyň Halkara žurnalistikasy fakultetiniň talyplarynyň gatnaşmagynda döredijilik duşuşygy geçirildi. Oňa daşary ýurt Habarlar agentlikleriniň hem ýurdumyzda zähmet çekýän wekilleri gatnaşdylar. Olaryň hatarynda “TАСС” habarlar agentliginiň ýurdumyzdaky habarçysy Oleg Powlenko, “РИA Новости” habarlar agentliginiň habarçysy Amangeldi Nurmyradow, “Associated Press-USA”-yň habarçysy Aleksandr Werşinin dagylar bar. Şeýle-de bu duşuşyga Türkmenistanyň Telewideniýe, radiogepleşikler we kinemotografiýa baradaky döwlet komitetiniň Halkara gatnaşyklary bölüminiň müdiriniň orunbasary Maýa Saparowa, hem-de “Türkmenistan” teleýaýlymynyň baş redaktory Sähra Ahmedowa, “Watan” habarlar gepleşiginiň baş redaktory Döwlet Inerow, “Türkmen dünýäsi” gazetiniň jogapkär kätibi Döwrangeldi Agalyýew we Halkara habarlar merkeziniň bölüm müdiri Tahyr Hojaýew, fotohabarçy Meretdurdy Rozyýew dagy gatnaşdylar.
Duşuşykda çykyş edenler ýaş halkaraçy žurnalistlere öz iş tejribelerinden gyzykly gürrüňleri berdiler. Esasan hem myhmanlar häzirki sanly döwürde internet žurnalistikasynyň, metbugat žurnalistikasynyň we teležurnalistikanyň orny, internetde maglumatlary ýerleşdirmegiň aýratynlyklary barada giňişleýin gürrüň berdiler. Duşuşygyň dowamynda talyplar özlerini gyzyklandyrýan sowallar bilen halypa žurnalistlere ýüzlendiler. Geçirilen döredijilik duşuşygy halkaraçy žurnalist hökmünde zähmet çekjek talyplaryň başarnyklaryny kämilleşdirmeklerine uly itergi bolar.
Seýli ARYŞOW,
Türkmenistanyň Daşary işler ministrliginiň
Halkara gatnaşyklary institutynyň V ýyl talyby.
Şeýle hem bu barada şu ýerden okap bilersiňiz:
https://turkmenistaninfo.gov.tm/news/188
https://turkmenistaninfo.gov.tm/news/189