HORMATLY MYHMAN BILEN DUŞUŞYK
2023-nji ýylyň 20-nji iýulynda Türkmenistanyň Daşary işler ministrliginiň Halkara gatnaşyklary institutynda Braziliýa Federatiw Respublikasynyň Türkmenistandaky Adatdan daşary we Doly ygtyýarly Ilçisi (oturýan ýeri – Astana ş.) Rubem Antonio Korrea Barboza bilen duşuşyk geçirildi. Oňa Milli diplomatiýanyň ýokary okuw mekdebiniň, Halkara ynsanperwer ylymlary we ösüş uniwersitetiniň we Döwletmämmet Azady adyndaky Türkmen milli dünýä dilleri institutynyň professor mugallymlary we talyp ýaşlary gatnaşdylar.
Duşuşygyň barşynda hormatly Ilçi Türkmenistan bilen Braziliýa Federatiw Respublikasynyň arasyndaky syýasy-diplomatik, söwda-ykdysady, medeni-ynsanperwer ugurlar boýunça ýetilen sepgitler we durmuşa geçirilen işler barada, şeýle hem özüniň baý iş we durmuş tejribesi hakda gyzykly gürrüňler berdi.
Täsirli geçen duşuşygyň ahyrynda talyplar Ilçä özlerini gyzyklandyrýan soraglary berdiler. Duşuşykdan soňra jenap Ilçi institutyň «Parahatçylygyň ýaş çaparlary» akyl-paýhas bäsleşigi geçirilýän türkmeniň Ak öýi bilen ýakyndan tanyş boldy.
Döwletýar ARÇAMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.