Hindistanyň ilçisi bilen duşuşyk geçirildi
2023-nji ýylyň 24-nji aprelinde Türkmenistantň Daşary işler ministrliginň Halkara gatnaşyklary institutynda Hindistanyň Türkmenistandaky Adatdan daşary we doly ygtyýarly ilçisi Widhu Pithambaran Nair bilen duşuşyk geçirildi. Oňa Hindistanyň Türkmenistandaky ilçihanasynyň, şeýle-de ýurdumyzyň daşary syýasat edarasynyň wekilleri, institutyň halypa mugallymlary, talyp ýaşlary gatnaşdylar. Duşuşyk iki döwletiň arasyndaky diplomatik gatnaşyklaryň 31 ýyllygyna bagyşlanyp geçirildi.
Duşuşykda Hindistanyň Türkmenistandaky Adatdan daşary we Doly ygtyýarly ilçisi çykyş edip, türkmen-hindi gatnaşyklarynyň taryhy kökleriniň gadymy döwürlerden alyp gaýdýandygyny, iki halky medeni gatnaşyklaryň, binýatlyk ruhy gymmatlyklaryň birleşdirýändigini, 1992-nji ýylyň 20-nji aprelinde türkmen-hindi gatnaşyklarynyň müňlerçe ýyllyk taryhynda täze döwüriň başlanýandygyny nygtady.
Çykyş edenleriň belleýşi ýaly, Baýram han, Abdyrahman han-hanan ýaly meşhur döwlet işgärleriniň atlary, Türkmenistandaky beýik hindi medeniýetiniň mirasy – bularyň ählisi köpasyrlyk gatnaşyklaryň ýyl ýazgysyna altyn harplar bilen ýazyldy. Häzirki döwürde bu ajaýyp miras täze many-mazmun bilen baýlaşdyrylýar. Duşuşykda Hindistanyň Türkmenistandaky ilçihanasy tarapyndan Türkmenistanyň daşary işler ministrliginiň Halkara gatnaşyklary institutyna kitaplar gowşuruldy. Istitutyň talyplarynyň hindi dilinde aýdymlary ýerine ýetirmegi, serginiň gurnalmagy duşuşygyň täsirliligini has-da artdyrdy.
Mahym NARMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.
Bu hakda şu ýerden hem
okap bilersiňiz: