Halypa diplomat bilen geçirilen täsirli sapak
2024-nji ýylyň 29-njy martynda Türkmenistanyň Daşary işler ministrliginiň Halkara gatnaşyklary institutynyň Türkmenistanyň diplomatiýasynyň möhüm ugurlary boýunça okuw merkeziniň “Öňüni alyň diplomatiýasy” ugrunyň çäginde “Bitarap Türkmenistanyň daşary syýasatynyň esasy ugurlary” atly okuw sapagy geçirildi.
Okuw sapagyny institutyň Halkara gatnaşyklary we diplomatiýa kafedrasynyň müdiri taryh ylymlarynyň doktory, professor, Türkmenistanyň Adatdan daşary we Doly ygtyýarly ilçisi, Türkmenistanyň ussat diplomaty Amangeldi Rahmanow alyp bardy. Professor A.Rahmanow talyplara “Bitarap Türkmenistanyň daşary syýasy ugrunyň 2022 — 2028-nji ýyllar üçin Konsepsiýasy” barada giňişleýin gürrüň berip, Konsepsiýada göz öňünde tutulan esasy ugurlaryň üstünde durup geçdi.
Mundan başga-da, A.Rahmanow Türkmenistanyň Öňüni alyş diplomatiýasyna berýän ähmiýeti hem-de bu ugurda alnyp barylýan işler barada belläp geçdi. Şeýle-de professor öz diplomatik tejribesinden birnäçe mysallary getirip, talyplara birnäçe maslahatlary berdi.
Söhbetdeşligiň dowamynda talyp ýaşlar professor A.Rahmanowa özlerini gyzyklandyrýan sowallar bilen ýüzlendiler.
Rahym AKMURADOW,
Türkmenistanyň Daşary işler ministrliginiň
Halkara gatnaşyklary institutynyň mugallymy.