HALYPA BILEN TÄSIRLI OKUW SAPAGY
2024-nji ýylyň 1-nji martynda Türkmenistanyň Daşary işler ministrliginiň Halkara gatnaşyklary institutynda «Merkezi Aziýa sebitinde öňüni alyş diplomatiýasynyň häzirki zaman mehanizmleri» atly okuw sapagy geçirildi. Okuw sapagyny Halkara gatnaşyklary we diplomatiýa kafedrasynyň uly mugallymy, Türkmenistanyň Adatdan daşary we Doly ygtyýarly ilçisi Nurberdi Amanmyradow alyp bardy.
Sapagyň dowamynda N.Amanmyradow talyplary häzirki zaman halkara gatnaşyklarynda we halkara hukugynda öňüni alyş diplomatiýasynyň mehanizmleri, usullary we tejribeleri bilen tanyşdyrdy. N.Amanmyradow öz çykyşynda öňüni alyş diplomatiýasy parahatçylyga we howpsuzlyga howp salýan wehimleri ýüze çykarmakda hem-de aradan aýyrmakda döwletlere ýardam bermek boýunça möhüm gural bolup durýandygyny belledi.
Mundan başga-da, ilçi Aşgabatda ýerleşýän BMG-niň Merkezi Aziýa üçin öňüni alyş diplomatiýasy boýunça Sebit merkeziniň sebitde terrorçylyk we zor salynýan ekstremizm, guramaçylykly jenaýatçylyk, neşe serişdeleriniň ýaýradylmagy we Owganystandaky ýagdaýlar ýaly transmilli howplara çenli has çylşyrymly meseleler boýunça hödürleýän mehanizmleri barada gürrüň berdi.
Söhbetdeşligiň dowamynda talyp ýaşlar N.Amanmyradowa özlerini gyzyklandyrýan sowallar bilen ýüzlendiler.
BMG-niň Merkezi Aziýa üçin öňüni alyş diplomatiýasy boýunça Sebit merkezi «Öňüni alyş diplomatiýasy akademiýasy» maksatnamasy boýunça ýokary okuw mekdepleri bilen meýilnamalaýyn işleri alyp barýar. Agzalan maksatnama boýunça 2024-nji ýylda Halkara gatnaşyklary institutynyň 4 sany talyby saýlanyp alnyp, olar ýylyň dowamynda degişli ugurlarda öz bilimlerini artdyrarlar.
Rahym AKMURADOW,
Türkmenistanyň Daşary işler ministrliginiň
Halkara gatnaşyklary institutynyň mugallymy